अन्तराष्ट्रिय

ममताका मन्त्री पार्थ चटर्जीकी निकट सहयोगी अर्पिता मुखर्जीको घरमा ईडीको छापाः २० करोड नगद प्राप्त, शिक्षक भर्ती घोटालासँग सम्बन्धित 

Post Views: 366

कोलकाता । पश्चिम बंगालका उद्योग मन्त्री पार्थ चटर्जीकी निकट सहयोगी अर्पिता मुखर्जीको घरमा प्रवर्तन निर्देशनालय (ईडी)ले शुक्रबार छापा मारेको छ । यस कारबाहीमा मुखर्जीको घरबाट २० करोड रुपैयाँ नगद बरामद भएको भारतीय सञ्चार माध्यमले समाचार छापेको छ । यो रकम विद्यालय सेवा आयोग (एसएससी) घोटालामा कमाएको अनुसन्धान एजेन्सीले आशंका गरेको छ ।

ईडीको टोलीले पार्थ चटर्जी, शिक्षा राज्यमन्त्री परेश सी अधिकारी, विधायक माणिक भट्टाचार्यलगायतका १३ ठाउँमा छापा मारेको थियो । तर, उनीहरुसँग नगद भेटिएको छैन । ईडीले हाल पश्चिम बंगाल स्कूल सेवा आयोग र पश्चिम बंगाल प्राथमिक शिक्षा बोर्डमा भर्ती घोटालाको अनुसन्धान गरिरहेको छ ।

एसएससी भर्ती घोटालाको सम्बन्धमा ईडी अधिकारीहरूले शुक्रबार बिहान ८ बजेदेखि पार्थ चटर्जीसँग सोधपुछ गरिरहेका छन् । एसएससी मार्फत शिक्षक नियुक्तिका लागि करोडौंको कारोबार भएको बताइएको छ । यो घोटाला हुँदा पार्थ चटर्जी शिक्षामन्त्री थिए ।

चटर्जी विरुद्ध कलकत्ता उच्च अदालतमा एक याचिका पनि दायर गरिएको छ, जसमा उनका नजिकका १० जना सहयोगीलाई अवैध रूपमा रोजगारी दिएको आरोप लगाइएको छ । याचिकामा भनिएको छ कि यी व्यक्तिहरू चटर्जीका सुरक्षा गार्डका आफन्त हुन् । अदालतले यस विषयमा अर्को हप्ता सुनुवाइ गर्ने सम्भावना छ ।

चटर्जीकी निकट सहयोगी अर्पिताको घरबाट पनि २० भन्दा बढी मोबाइल बरामद भएको छ । यद्यपि अर्पिताले यति धेरै फोन किन प्रयोग गरिरहेकी थिइन् भन्ने अहिलेसम्म खुल्न सकेको छैन । ईडी अधिकारीहरूले ५०० र २००० को नोट गणना गर्न मेसिनको मद्दत लिनुपरेके थियो ।