२८ करोड बिगो ८ वर्ष जेल सजायको फैसला भएका निलम्बित मेयर बस्नेत कांग्रेसी मञ्चबाट कुर्लिँदा ईमान्दारहरुको भागाभाग

काठमाडौं । नेपाली कांग्रेसको शुभेच्छुक संस्था नेपाल लोकतान्त्रिक खेलकुद संघको क्षेत्र, प्रदेश, तथा नगरको प्रथम अधिवेशन यही साउन ३ गते नागार्जुन नगरपालिका अन्तर्गत रामकोट फस्कुको थापा पाटी प्यालेसमा सम्पन्न भएको थियो । उक्त अधिवेशन गर्नका लागि लोकतान्त्रिक खेलकुद संघले प्रतिनिधिको रुपमा जिल्ला समन्वय समिति काठमाडौंका प्रमुख सन्तोष कुमार बुढाथोकीलाई पठाएको थियो ।

सन्तोष कुमार बुढाथोकी समन्वयको प्रमुख भएता पनि उनी सरकारी सेतो प्लेटको गाडी लिएर समन्वयको काम भन्दा कांग्रेसको क्षेत्रीयस्तरको कार्यक्रममा दौडिरहेका हुन्छन् । यसरी सरकारी गाडी बिदाको दिन लिएर हिँडेको अवस्थामा सामाजिक अभियन्ता आशिका तामाङले सडकमै पटक पटक बेइजती समेत गरिसकेकी छिन् ।

प्रतिनिधि खटेर गएका कारण निलम्बित मेयर मोहनबहादुर बस्नेतलाई टेलिफोनबाट निमन्त्रण दिएको कारण आफु उपस्थित भएको बस्नेतले कार्यक्रममै बताए । खेलकुदका खेलाडीभन्दा कांग्रेसका केन्द्र, जिल्ला तथा क्षेत्रीयस्तरका नेताहरुको बहुल्यता भएका कारण प्रथम अधिवेशनले तिनै तहका कमिटीहरु पूरा बनाउन समेत सकेन । ९ नं. क्षेत्रको त पुरै टिम खाली रहेको छ ।

यता अख्तियारले मेयर मोहन बहादुर बस्नेत विरुद्ध विशेष अदालतमा दर्ता गरेको मुद्दामा निलम्बित मेयर मोहन बहादुर बस्नेतलाई २८ करोडभन्दा बढी बिगो र आठ वर्ष जेल सजायको फैसला सुनाएको थियो । निलम्बित मेयर बस्नेतलाई उक्त कार्यक्रममा बोल्न नदिन केन्द्रीय स्तरका नेतादेखि क्षेत्रीय समितिको आग्रहलाई जिल्ला समन्वय समितिका प्रमुख एवं प्रतिनिधि सन्तोष कुमार बुढाथोकी र काठमाडौं कांग्रेसका कोषाध्यक्ष राजेन्द्र बुढाथोकीले नमान्दा क्षेत्रीय सभापति जयकृष्ण महर्जन, क्षेत्रीय सचिव सन्तोष गिरी र क्षेत्रीय सदस्य माधव न्यौपाने कार्यक्रमस्थलबाट बाहिरिएका थिए । अन्य इमान्दार नेता तथा कार्यकर्ता पनि निलम्बित मेयर मोहनबहादुर बस्नेत बोलिरहँदा हलबाट उठेर बाहिरिएका थिए ।

निलम्बित मेयर मोहनबहादुर बस्नेतले मञ्चबाट भाषण गर्दैगर्दा नगरको विकासमा आफ्नो व्यक्तिगत रकम खर्च गरेकोले कांग्रेललाई आफु चाहिने तर आफुलाई कांग्रेस नचाहिने, आम निर्वाचनमा जिताउन नसके पनि हराउन सक्छु भन्दै काग्रेसी नेताहरुलाई धम्क्याएका थिए ।
त्यसैगरी निलम्बित मेयर बस्नेतले विशेष अदालतबाट मुद्दा हारेपनि सर्वाेच्चबाट जितेर आउने भन्दै नगरपालिकाका कर्मचारीहरुलाई विभिन्न दवाव दिइरहेको एक कर्मचारीले बताए । निलम्बित भए पनि मासिक आधा तलव पठाइदिन पटक पटक नगरपालिकाका कर्मचारीहरुलाई टेलिफोन गरेको सुत्रको दावी छ । उता वार्षिक बजेट आफुले भनेअनुसार गर्नु भन्दै विभिन्न योजना पठाएर दवाव दिएको सुत्र बताउँछ ।

उक्त खेलकुद कार्यक्रमको अधिवेशनमा कांग्रेसका केन्द्रीय सदस्य ध्यानगोविन्द रञ्जित, केन्द्रीय सदस्य नानु बास्तोला, पूर्व केन्द्रीय सदस्य किरण गिरी, काठमाडौं कांग्रेसका कोषाध्यक्ष राजेन्द्र बुढाथोकी, काठमाडौं कांग्रेसका जिल्ला सदस्य रामेश्वरी ठकुराठी, नेपाली कांग्रेस महासमिति सदस्यहरु रिता ढकाल, कल्यानी खड्का, गोमादेवी गुरुङ, डा. अमिता प्रधान, दिलमाया अधिकारी, महाधिवेशन प्रतिनिधिहरु बासु कार्की, श्यामकृष्ण खड्का, कार्यक्रम सञ्चालक एवं महाधिवेशन प्रतिनिधि शिवजी भट्टराई, प्रदेश सभापति राजेन्द्रप्रसाद भट्टराई, उपसभापति रमेशप्रसाद गौतम, तामाङ संघका जिल्ला अध्यक्ष शशीकर लामा, निवर्तमान वडा सदस्य विश्वकर लामा, क्षेत्रीय समितिका प्रेम गुरुङ, अनिल लामा, पूर्व महाधिवेशन प्रतिनिधि राजेन्द्र केसी लगायत थोरै मात्रामा खेलाडीहरु उपस्थित रहेका थिए भने कांग्रेस नेता तथा कार्यकर्ताहरुको बहुल्यता रहेको थियो ।