स्वास्थ्य विभाग मातहतका सेवाको वार्षिक समीक्षा : सेवाग्राहीको संख्या बढाउनु पर्नेमा जोड

काठमाडौँ । काठमाडौँ महानगरपालिकाको स्वास्थ्य विभागले मातहतका सेवाको वार्षिक समीक्षा थालेको छ । स्वास्थ्य प्रवर्धन केन्द्र र वडा क्लिनिकका स्वास्थ्यकर्मीका विच आज थालिएको समीक्षामा केन्द्र तथा क्लिनिक इन्चार्जहरुले आधारभूत सेवामा सेवाग्राही सन्तुष्ट रहेको र विशेषज्ञ सेवाका लागि क्षमता बढाउँदै जानु पर्ने धारणा राखेका थिए ।

समीक्षा उद्घाटन अवसरमा बोल्दै महानगरपालिकाका प्रमुख प्रशासकीय अधिकृत बसन्त अधिकारीले भने, स्वास्थ्य क्षेत्रलाई लैङ्गिक, सामाजिक तथा मानसिक अवस्था, सहरी आचरण, खानपान, बजारलगायतका कोणबाट हेरेर सेवा वितरणमा सन्तुलन गर्न आग्रह गरेका थिए ।

‘नागरिकलाई रोगबाट बचाउन आहार, विहार, आचार विचारसँग सम्बन्धित स्वच्छ भान्सा, आरोग्य जीवनलगायत कार्यक्रम थालिएको छ ।’ अधिकारीले भने, ‘रोग लागेको विरामीको सहज, सरल र पहुँच योग्य उपचारका लागि सुलभ फार्मेसीलगायत कार्यक्रम कार्यान्वयन चरणमा ल्याइएको छ । यसलाई सफल कार्यान्वयन गरेर स्वास्थ्य सेवामा सेवाग्राहीको संख्या बढाउनु पर्छ । यसमा तपाईँहरुको नतिजा देखिन्छ ।’ समीक्षामा वडा नंं ११ का अध्यक्ष एवं भवन समितिका संयोजक हीरालाल तण्डुकारले, ‘स्वास्थ्य र शिक्षालाई निःशुल्क बनाउनेतिर कार्यक्रम सञ्चालन थालिएको बताए ।’

काठमाडौँ महानगरपालिकाले स्वास्थ्य ऐन जारी गरिसकेको छ । हाम्रो हिँड्ने बाटो त्यही हो । यसको अध्ययन गर्नुहोला । कार्यक्रममा विभागका प्रमुख रामप्रसाद पौडेलले, स्वास्थ्य सेवा प्रविधिमा आधारित हुने भएकोले प्रविधिमा अभ्यस्त हुन र सेवाग्राहीमैत्री व्यवहारबाट विरामीको मन जित्ने सिपको विकास गर्न आग्रह गरे । जिल्ला स्वास्थ्य कार्यालय काठमाडौँका प्रमुख सागर घिमिरेले, स्वास्थ्य क्षेत्र सुधारका लागि केन्द्र सरकारले लिएका लक्ष्य कार्यान्वयनको अवस्था पालिकाहरुले प्राप्त गरेको नतिजामा देखिने धारणा राखे । पालिकाहरुले उपलब्ध गराएका सेवाको तथ्याङ्क दुरुस्त हुनुपर्छ । यो सम्भव भएन भने भरपर्दो हुनुपर्छ । घिमिरेको भनाइ थियो ।

समीक्षामा प्रस्तुतिकरण गर्दै स्वास्थ्य महाशाखा प्रमुख सजिना महर्जनले, स्वास्थ्य प्रवर्धन केन्द्रको स्थापना, स्वास्थ्य ऐन निर्माण, अनलाइन प्रणालीमा आधारित औषधि तथा औषधिजन्य सामग्री वितरण गएको बर्षका उपलब्धी भएको महर्जनको भनाइ थियो ।
एनका अनुसार सबै वडा क्लिनिकलाई स्तरोन्नति गरेर स्वास्थ्य प्रवर्धन केन्द्रका रुपमा सञ्चालन गर्ने लक्ष्यअनुरुप वडा नं. १, ७, ८, ९, १४, १९, २६ र ३० गरी ८ वटा वडामा स्वास्थ्य प्रवर्धन केन्द्र सञ्चालनमा आइसकेका छन् । वडा नंं ३, ५, ६, १०, ११, १२, १७, १८, २२, २७ र २८ गरी ११ वटा वडामा पूर्वाधार निर्माण सम्पन्न भइसकेको छ । वडा नं. २, १३, १६, २०, २१, २३ र २४ मा स्थान पहिचान भइसकेको छ । पूर्वाधार निर्माणको काम बाँकी छ । बाँकी ६ वटा वडामा स्थान पहिचानको प्रक्रिया चलिरहेको छ । महानगरपालिकाले आउँदो ६ महिनाभित्र २० वटा वडामा स्वास्थ्य प्रवर्धन केन्द्र सञ्चालन गर्ने लक्ष्य राखेको छ ।

विभागले महानगरपालिकाभित्रका निजी स्वास्थ्य संस्थाको विवरण संकलन गरेको छ । यसमा २ हजार १ सय वटा स्वास्थ्य संस्था देखिएका छन् । चालु आर्थिक बर्षमा स्वर्णिम तथा गौरव योजनामा भएका कार्यक्रमसहित इम्प्लान्ट तथा औषधिबाट गरिने गर्भपतन सेवा केन्द्रको विस्तार, आधारभूत स्वास्थ्य सेवाको पहुँच विस्तार, सेवा व्यवस्थापन गर्न जनशक्तिको क्षमता विकास, अनलाइन प्रणालीमा आधारित प्रक्रियालगायत कामलाई विभागले प्राथमिकतामा राखेको छ ।