काठमाडौं । काराबाओ कपमा म्यानचेस्टर युनाइटेडले आफ्नै मैदानमा अप्रत्याशित हार व्यहोरेको छ। ओल्ड ट्राफोर्डमा बुधबार राति भएको खेलमा दुई गोलले अघि रहेको युनाइटेडलाई ब्राइटन एन्ड होभ एल्बियनले दोस्रो हाफमा उत्कृष्ट पुनरागमन गर्दै ३–२ ले पराजित गरेको हो।
खेलको सुरुवातमै युनाइटेडले प्रभावशाली प्रदर्शन गर्दै १० मिनेटभित्र दुई गोल गरेको थियो। एकेडेमीबाट आएका शी लासीले आठौँ मिनेटमा गोल गर्दै युनाइटेडलाई अग्रता दिलाए। त्यसको दुई मिनेटपछि मेसन माउन्टले गोल थपेपछि घरेलु टोली २–० ले अघि बढ्यो।
तर दुई गोलको अग्रता लामो समय टिकेन। पहिलो हाफ सकिनुअघि नै ब्राइटनले खेलमा फर्किने संकेत देखायो। चारालाम्पोस कोस्टौलासले इन्जुरी समयमा गोल गर्दै अन्तर २–१ मा झारे।
दोस्रो हाफमा भने ब्राइटनले खेल आफ्नो नियन्त्रणमा लियो। युनाइटेडको रक्षापंक्तिले लगातार दबाब थेग्न नसक्दा पास्कल ग्रोसले गोल गर्दै खेल २–२ को बराबरीमा ल्याए।
बराबरीपछि पनि ब्राइटन रोकिएन। प्रशिक्षक माइकल क्यारिकले खेलाडी परिवर्तन गरे पनि ब्राइटनका वैकल्पिक खेलाडी म्याक्सिम डे क्युपरले मैदान प्रवेश गरेलगत्तै गोल गर्दै पाहुना टोलीलाई ३–२ को अग्रता दिलाए।
त्यसपछि युनाइटेडले बराबरीका लागि प्रयास गरे पनि ब्राइटनको रक्षापंक्ति तोड्न सकेन। ब्रुनो फर्नान्डेस मैदान प्रवेश गरेपछि युनाइटेडले केही अवसर सिर्जना गरे पनि ब्राइटनका गोलरक्षक जेसन स्टिलले उत्कृष्ट बचाउ गर्दै घरेलु टोलीलाई गोल गर्न दिएनन्।
हारसँगै युनाइटेड लगातार दोस्रो सिजन काराबाओ कपको सुरुआती चरणबाटै बाहिरिएको छ। गत सिजन ग्रिम्स्बीसँग पराजित भएर प्रतियोगिताबाट बाहिरिएको युनाइटेड यसपटक पनि आफ्नै मैदानमा स्तब्ध भयो।
युनाइटेडले दुई गोलको अग्रता लिएर घरेलु मैदानमा हार व्यहोरेको यो प्रिमियर लिग युग सुरु भएयता सबै प्रतियोगितामा पहिलो पटक भएको ESPN को तथ्यांकमा उल्लेख छ। यसअघि यस्तो घटना सन् १९७६ मा टोटनहमसँग ३–२ ले पराजित हुँदा भएको थियो।
पराजयपछि ओल्ड ट्राफोर्डमा समर्थकहरूले प्रशिक्षक क्यारिक र टोलीप्रति असन्तुष्टि जनाएका थिए। खेल सकिएपछि मैदानमा युनाइटेड समर्थकको आक्रोशपूर्ण प्रतिक्रिया सुनिएको थियो।