काठमाडौं । पोर्चुगिज फुटबल स्टार क्रिस्टियानो रोनाल्डोले आफ्नो पहिलो टेलिभिजन सिरिज ‘Day 1s’ को निर्माण सुरु भएको घोषणा गरेका छन्। फुटबल मैदानमा विश्वभर चर्चा कमाएका रोनाल्डो अब टेलिभिजन मनोरञ्जन क्षेत्रमा पनि प्रवेश गर्ने तयारीमा छन्।
रोनाल्डोले नोभेम्बर ११ मा सामाजिक सञ्जालमार्फत आफ्नो पहिलो टेलिभिजन सिरिजको निर्माण सुरु भएको जानकारी सार्वजनिक गरेका हुन्। यस परियोजनामा उनी कार्यकारी निर्माताका रूपमा जोडिएका छन्।
‘Day 1s’ बेलायती फुटबल जगत् र खेलाडीको ट्रान्सफर कारोबारको पृष्ठभूमिमा आधारित काल्पनिक सिरिज हो। यसमा अभिनेता डेमियन लुइसले फुटबल एजेन्ट स्ट्यान्ली डाल्टनको भूमिका निर्वाह गर्नेछन्। पूर्वफुटबलर थियरी हेनरी र बेलायती र्यापर Dave पनि यस परियोजनासँग जोडिएका छन्।
सिरिज रोनाल्डो र फिल्म निर्देशक म्याथ्यु भनको संयुक्त स्टुडियो UR•Marv मार्फत निर्माण भइरहेको छ। यसअघि जुलाई २०२६ मै लन्डनमा यसको छायांकन सुरु भएको खबर सार्वजनिक भएको थियो।
फुटबल करियरमा विभिन्न कीर्तिमान बनाएका रोनाल्डोको टेलिभिजन क्षेत्रमा यो पहिलो ठूलो परियोजना हो। सिरिजको प्रसारण मिति र कुन प्लेटफर्मबाट सार्वजनिक हुने भन्नेबारे भने आधिकारिक जानकारी आइसकेको छैन।
