काठमाडौँ । काठमाडौँ महानगर पालिका महिला सामुदायिक स्वास्थ्य स्वयम सेविका परिचालन तथा कोष सञ्चालन निर्देशिका २०७९ को मस्यौदा विधायन समितिमा पठाउने निर्णय भएको छ । शुक्रबार उपप्रमुख सुनिता डंगोलको अध्यक्षतामा बसेको बैठकले यस्तो निर्णय गरेको हो । काठमाडौँ महानगरमा २०५२ सालदेखि स्वास्थ्य स्वयम सेविकाहरु काम गरिरहेका छन् । ५५८ संख्यामा रहेका स्वयम सेविका मध्ये ५ जनाको मृत्यु भइसकेको छ । विदेशगएर वा यस्तै अन्य कारणले २५ जना अनुपस्थित छन् । बाँकी ५२८ मध्ये ६३ जनाको उमेर ६० बर्ष पूरा भइसकेको छ ।
खोप लगायत स्वास्थ्य सम्बन्धी राष्ट्रिय कार्यक्रम सञ्चालन हुँदा स्वयम सेविकाहरु परिचालन हुने गरेका छन् । सरकारका स्वास्थ्य सेवा सम्बन्धी जानकारी समुदायमा लैजाने मुख्य जिम्मेवारी उहाँहरुकै हो । यस सन्दर्भमा उहाँहरुको व्यवस्थापन, हित र परिचालनलाई व्यवस्थापन गर्नुपर्ने भएकोले निर्देशिका जारी गर्न लागिएको उपप्रमुख डंगोलको भनाइ छ । निर्देशिकामा सामुदायिक महिला समूहको गठन, स्वयम सेविका छनौट, कार्य अवधि, पद रिक्तहुने अवस्था, तालिम तथा क्षमता विकास, कामकर्तव्य र अधिकार लगायत विषय समेटिने छन् ।
स्वयम सेविकाहरुको हित प्रवर्धन गर्न सञ्चालन गरिने केन्द्रीय र वडा स्तरीय कोष सञ्चालन, प्रोत्साहनका कार्यक्रम निर्देशिकामा समेटिएका छन् । महानगरबासीको स्वास्थ्यमा सेवाको पहुँच सुनिश्चित गर्न तथा स्वस्थ्य सहर निर्माणको लक्ष्य पूरा गराउन स्वास्थ्य स्वयम सेविकाहरुको परिचालन गर्न सरकारले कार्यक्रम सञ्चालन रणनीति जारी गरेको छ । यही रणनीतिका आधारमा महानगरले निर्देशिका जारी गर्न लागेको हो ।
बैठकमा महानगरका प्रवक्ता नविन मानन्धर, शिक्ष तथा स्वास्थ्य समितिका संयोजक चिनी काजी महर्जन सहित अधिकारीहरु सहभागी हुनुहुन्थ्यो । महिला स्वास्थ्य स्वयम सेविकाका तर्फबाट जानुका श्रेष्ठ भण्डारी, संघ संस्थाको प्रतिनिधित्व गर्दै भवानी अधिकारी, सीमान्तकृत, लोपोन्मुखतथा सेवाको प्रयोग कमभएका समुदायको प्रतिनिधित्वगर्दै उर्मिला मगैया र रजनी देउलाले निर्देशिका सम्बन्धी छलफलमा भाग लिनुभएको थियो । बैठकले स्वयम सेविकाहरुको तालिम लगायत क्षमता विकासका कार्यक्रम सञ्चालन गर्ने, उमेर हदका कारण सेवा रहन नसक्ने स्वयम सेविकाहरुको विदाइ गर्ने लगायत विषयमा छलफल गरेको थियो ।
Add Comment