क्वालालम्पुर । मलेसियाको राजधानी क्वालालम्पुर नजिकै रहेको सेलान्गोर राज्यमा ग्यास पाइपलाइन विस्फोट हुँदा भयानक दुर्घटना भएको छ । रिपोर्टका अनुसार पुत्रा हाइट्समा मंगलबार ग्यास पाइपलाइनमा आगलागी हुँदा ठूलो विष्फोट भएको थियो । त्यसपछि अधिकारीहरूले वरपरका आवासीय क्षेत्रहरू खाली गर्न निर्देशन दिएका छन्। मलेसियाली मिडिया रिपोर्टका अनुसार सेलान्गोर राज्यको बीचमा रहेको पुत्रा हाइट्समा रहेको एउटा ग्यास स्टेशन नजिकै आगलागी भएको हो । आगोको यो बादल धेरै किलोमिटर टाढाबाट देख्न सकिन्छ । ग्यासको आगो नियन्त्रणका लागि दमकल पठाइएको छ । घटनास्थलमा मेडिकल टोली पनि पठाइएको छ ।
स्थानीय अधिकारीहरूलाई उद्धृत गर्दै मलेसियाली सञ्चारमाध्यमले विस्फोटमा १२ जना गम्भीर घाइते भएको र ८२ जनाको उद्धार गरिएको बताएको छ । द स्टार अखबारले फायर डिपार्टमेन्टका निर्देशक वान मोहम्मद रजाली वान इस्माइललाई उद्धृत गर्दै भने कि उद्धार कार्यका लागि दर्जनौं अग्निनियन्त्रकहरूलाई तुरुन्तै घटनास्थलमा पठाइएको थियो । पाइप फुटेर आगलागी भएको टोलीले जनाएको छ ।
रिपोर्टका अनुसार मलेसियाली समय अनुसार राति ८ः१० बजे विस्फोट भएको थियो । आगलागी र विस्फोटको कारण पेट्रोनास ग्यास पाइपलाइनमा चुहावट भएको बताइएको छ । पाइपलाइनको करिब ५ सय मिटरमा आगलागी भएको छ । पाइपलाइनमा आगलागी भएपछि धेरै घरमा आगलागी भएको र केही मानिस आगोमा फसेको बीएनओ न्यूजले आफ्नो रिपोर्टमा जनाएको छ । प्रतिवेदन तयार पार्दासम्म आगलागीमा कति मानिस फसेका छन् वा कतिले ज्यान गुमाएका छन् भन्ने खुल्न सकेको छैन ।
हालसम्म प्राप्त जानकारी अनुसार दुर्घटनामा परी घाइते भएकाहरुको पुत्रहाइट मस्जिद बहुउद्देश्यीय हलमा रहेको अस्थायी राहत केन्द्रमा उपचार भइरहेको छ । धेरैलाई गम्भीर अवस्थामा अस्पताल ल्याइएको खबर छ । नजिकैका ग्यास पाइपलाइनहरू बन्द गरिएका छन् र उद्धारकर्मीहरू चुहावट भएको ग्यास पाइपलाइनबाट इन्धन निकाल्ने काममा थप विस्फोट हुन नदिन काम गरिरहेका छन् ।
Add Comment