काठमाडौं — अमेरिका र इरानबीचको तनाव थप चर्किँदै जाँदा अमेरिकी सेनाले लगातार १२औँ रात पनि इरानका विभिन्न स्थानमा हवाई आक्रमण गरेको जनाएको छ।
अमेरिकी सेनाको सेन्ट्रल कमाण्ड (CENTCOM) का अनुसार यी आक्रमणहरू हर्मुज जलडमरूमध्य हुँदै आवतजावत गर्ने व्यापारी जहाज तथा नागरिक समुद्री यातायातमाथिको जोखिम कम गर्ने उद्देश्यले गरिएको हो।
अमेरिकी राष्ट्रपति डोनाल्ड ट्रम्पले इरानले हर्मुज जलडमरूमध्यमा कुनै पनि जहाजमाथि आक्रमण गरे अमेरिकाले प्रत्येक पटक एउटा पुल वा विद्युत् पूर्वाधारलाई निशाना बनाउने चेतावनी दिएका छन्।
यता, इरानका विदेशमन्त्री सेयद अब्बास अराघचीले कुनै पनि आक्रमणको ‘जस्ताको तस्तै जवाफ’ दिइने बताएका छन्। उनले इरानको पूर्वाधारमाथि हुने कुनै पनि आक्रमणको कडा प्रतिकार गरिने उल्लेख गरेका छन्।
इरानी सरकारी सञ्चारमाध्यमका अनुसार अमेरिकी मिसाइल आक्रमणमा पश्चिमी इरानका अहवाज, रामशिर र अन्दिमेश्क आसपासका क्षेत्र प्रभावित भएका छन्। साथै, इराक सीमावर्ती शलामचेह क्षेत्रमा भएको मिसाइल आक्रमणमा दुई जनाको मृत्यु भएको दाबी गरिएको छ।
यसैबीच, कुवेतका सैन्य अधिकारीहरूले आफ्नो हवाई प्रतिरक्षा प्रणालीले इरानबाट आएको भनिएका ड्रोन आक्रमणलाई प्रतिकार गरेको बताएका छन्।
यसअघि इरानले अमेरिकी आक्रमणको जवाफस्वरूप खाडी क्षेत्रका केही मुलुकका ऊर्जा पूर्वाधार तथा खानेपानी उत्पादन गर्ने डिसेलिनेसन प्लान्टहरूलाई लक्षित बनाएको आरोप लागेको छ।
अमेरिका र इरानबीचको बढ्दो तनावले विश्व ऊर्जा बजारमा अनिश्चितता थपिएको छ भने अन्तर्राष्ट्रिय कूटनीतिक प्रयासले हालसम्म उल्लेखनीय प्रगति गर्न सकेको छैन।
Add Comment