पोखरा । सभामुख कृष्णबहादुर महराले पत्रकारले समाजको रुपान्तरणका लागि उत्प्रेरक (क्याटलिष्ट)को भूमिका निर्वाह गर्नुपर्ने बताउनुभएको छ । नेपाल पत्रकार महासङ्घको केन्द्रीय साधारणसभा एवम् विधान अधिवेशनको पोखरामा उद्घाटन गर्दै उहाँले समाज परिवर्तनमा पत्रकारको महत्वपूर्ण भूमिका हुने बताउनुभयो । समाज बदलिँदा आउने अप्ठेरामा सञ्चार क्षेत्रको आलोचनात्मक भूमिका अपरिहार्य हुनुपर्नेमा जोड दिँदै उहाँले विगतमा निरङ्कुशता विरुद्धमा लड्नुपर्ने अवस्था थियो भने अबको समय अराजकता विरुद्ध लड्नुपर्ने बताउनुभयो ।
गण्डकी प्रदेश सरकारले आन्तरिक पर्यटन वर्ष घोषणा गरेकोप्रति स्वागत गर्दै सभामुख महराले गण्डकी प्रदेश पर्यटनको आकर्षक केन्द्र भएको उल्लेख गर्नुभयो । आफू १० वर्षअघि सञ्चारमन्त्रीको नेतृत्व संहाल्दा सञ्चार क्षेत्रको विकासका सन्दर्भमा केही महत्वपूर्ण कामको थालनी गरेको स्मरण गर्दै उहाँले वर्तमान सरकार पनि यस क्षेत्रको विकासका लागि अघि बढेको धारणा राख्नुभयो । उक्त अवसरमा सभामुख महराले विभिन्न व्यक्तित्वलाई सम्मान गर्नुभयो भने गण्डकी प्रदेशको आन्तरिक कार्यविधि लोकार्पण गर्नुभयो ।
महासङ्घद्वारा पत्रकारिता क्षेत्रसँग जोडिएका व्यक्तित्वका नाममा स्थापित पाँच जनालाई उक्त अवसरमा पुरस्कृत गरिएको थियो । नेपाल पत्रकार महासङ्घका संस्थापक एवम् पूर्वप्रधानमन्त्री कृष्णप्रसाद भट्टराईको नाममा स्थापित कृष्णप्रसाद भट्टराई राष्ट्रिय पत्रकारिता पुरस्कारबाट सप्तरीका शिवहरि भट्टराई सम्मान गरियो । पुरस्कारको राशि रु एक लाखको रहेको छ ।
त्यस्तै, गोविन्द वियोगी राष्ट्रिय पत्रकारिता पुरस्कारबाट दृष्टि साप्ताहिकका सम्पादक शम्भु श्रेष्ठलाई पुरस्कृत गरिएको छ । सो पुरस्कारको राशि रु ५० हजार रुपैयाँ र सम्मानपत्र छ । कृष्णसेन ‘इच्छुक’ राष्ट्रिय पत्रकारिता पुरस्कारबाट काठमाडौँका बलराम थापा पुरस्कृत हुनुभएको छ । सो पुरस्कारको राशि पनि रु ५० हजारको रहेको छ ।
यस्तै उमासिँह स्मृति पत्रकारिता पुरस्कारबाट सिरहाका हिरालाल चौधरी र गौरी कठायत स्मृति पत्रकारिता पुरस्कारबाट अछामकी गीता कुँवरलाई पुरस्कृत गरिएको छ । दुवै पुरस्कारको राशि रु १५ हजार रहेको छ । ग्ण्डकी प्रदेशका मुख्यमन्त्री पृथ्वी सुब्बा गुरुङले केन्द्रीकृत मानसिकताका कारण सङ्घीयता कार्यान्वयनमा अप्ठेरो पर्दै आएको बताउँदै सङ्घीयताको सफल कार्यान्वयनमा सञ्चार क्षेत्रको महत्वपूर्ण भूमिका हुने बताउनुभयो ।
प्रेस स्वतन्त्रता हनन हुन नदिन सरकार प्रतिबद्ध : मन्त्री बाँस्कोटा
कार्यक्रममा सञ्चार तथा सूचना प्रविधिमन्त्री गोकुलप्रसाद बाँस्कोटाले प्रेस स्वतन्त्रताको हनन हुन नदिन सरकार प्रतिबद्ध रहेको बताउनुभयो । उहाँले श्रमजीवी पत्रकारको हकहितका लागि सरकार सचेत रहेको प्रसङ्ग उल्लेख गर्दै न्यूनतम पारिश्रमिकमा २५ प्रतिशत वृद्धि गरिएको र यसको सुनिश्चितताका लागि बैंकिङ प्रणालीद्वारा व्यक्तिको नाममा भुक्तानीको व्यवस्था गरिएको स्पष्ट पार्नुभयो ।
समानुपातिक विज्ञापनका लागि सरकारले ‘विज्ञापनसम्बन्धी विधेयक’ संसद्मा पेश गरेको र सरकारले अब विज्ञापन बोर्डमार्फत विज्ञापन उपलब्ध गराउने मन्त्री बाँस्कोटाले जानकारी दिनुभयो । समानुपातिक माध्यमबाट विज्ञापन पाएपछि साना मिडिया बढी बलियो हुने उल्लेख गर्दै मन्त्री बाँस्कोटाले सरकार प्रेस स्वतन्त्रताको पक्षमा रहेकाले नै मुलुकी संहिता सम्बन्धमा प्रेससम्बन्धी सुझावका लागि कार्यदल गठन गरेको बताउनुभयो ।
संस्कृति, पर्यटन तथा नागरिक उड्डयनमन्त्री रवीन्द्र अधिकारीले मुलुकको समृद्धिका लागि पत्रकारिता क्षेत्रको महत्वपूर्ण भूमिका रहेको बताउनुभयो । नेपाल कम्युनिष्ट पार्टी (नेकपा)का पोलिटब्यूरो सदस्य योगेश भट्टराईले सरकारको विरुद्धमा भ्रम फैलाइएको उल्लेख गर्दै प्रेसजगत्को स्वतन्त्रता रक्षाका लागि सरकार कटिबद्ध रहेको उल्लेख गर्नुभयो ।
नेपाली काङ्ग्रेसका केन्द्रीय सदस्य कुमार खड्काले प्रेस स्वतन्त्रता, लोकतन्त्रको रक्षा आदिमा सञ्चार क्षेत्र चनाखो बन्नुपर्ने बताउँदै काङ्ग्रेस प्रेस स्वतन्त्रताको हिमायती रहेको बताउनुभयो । नेपाल पत्रकार महासङ्घका केन्द्रीय अध्यक्ष गोविन्द आचार्यको अध्यक्षतामा सम्पन्न भएको कार्यक्रममा राजपाका नेता लक्ष्मणराज कर्ण, सङ्घीय समाजवादी फोरमका उपमहासचिव प्रकाश अधिकारीका साथै नेपाल पत्रकार महासङ्घका पूर्वअध्यक्षहरू र विभिन्न सञ्चार क्षेत्र सम्बद्ध सङ्गठनका पदाधिकारीले सञ्चार क्षेत्रको समस्या लगायतका विषयमा प्रकाश पार्नुभएको थियो ।
Add Comment