काठमाडौं, मंसिर ६ । वि.सं. २०८१ मंसिर १६ गते आइतबारका दिन हुने स्थानीय तह उपनिर्वाचनको निर्वाचन कार्यक्रम अनुसार जिल्ला समन्वय समिति प्रमुख, नगरपालिका प्रमुख, उपप्रमुख र वडा अध्यक्ष तथा गाउँपालिका अध्यक्ष, उपाध्यक्ष र वडा अध्यक्षका रिक्त ४४ पदमा राजनीतिक दलबाट २८९ जना र १२१ जना स्वतन्त्र उम्मेदवार गरी जम्मा ४१० जनाको मनोनयनपत्र दर्ता भएकोमा ३१ जनाले उम्मेदवारी फिर्ता लिएका छन् ।
ओखलढुंगा र कैलाली जिल्लाको जिल्ला समन्वय समिति प्रमुखमा क्रमशः नेपाली काँग्रेसका उम्मेदवार श्री टेकराज भट्टराई र श्री टीका कुमारी चौधरी (भुल) निर्विरोध निर्वाचित भएका छन् । साथै रुकुम (पूर्वी भाग) जिल्ला पुथा उत्तरगंगा गाउँपालिका वडा नं. २ को वडा अध्यक्षमा नेपाल कम्युनिष्ट पार्टी (माओवादी केन्द्र) का उम्मेदवार श्री जगत घर्ती निर्विरोध निर्वाचित भएका छन् ।
स्थानीय तह उपनिर्वाचन प्रयोजनको लागि दर्ता भएका २५ वटा राजनीतिक दलमध्ये हाम्रो नेपाल पार्टी, नेपाल कम्युनिष्ट पार्टी (माक्सवादी लेनिनवादी), नेपाली कांग्रेस (वि.पी.), नेपाली जनता दल र आम जनता पार्टी गरी ५ वटा राजनीतिक दलले कुनै पनि रिक्त पदका लागि उम्मेदवारी दर्ता गराएनन् । यस अनुसार निर्विरोध निर्वाचन सम्पन्न भएका तीन स्थान बाहेक ४१ स्थानका विभिन्न पदहरूमा २० राजनीतिक दल र स्वतन्त्र उम्मेदवार समेत ३७६ जना उम्मेदवारलाई सम्बन्धित मुख्य निर्वाचन अधिकृत तथा निर्वाचित अधिकृतबाट निर्वाचन चिह्न प्रदान गरिएको छ ।
निर्वाचन कार्यक्रम अनुसार मिति २०८१/०८.०७ गतेदेखि मिति २०८१/०८/१३ गते राति १२ः०० बजेसम्म उम्मेदवारहरूले प्रचार प्रसार गर्न सक्नेछन् । मिति २०८१.०८/१३ गते राति १२ः०० बजेदेखि मतदान सम्पन्न नभएसम्म निर्वाचन प्रचार प्रसार निषेध अवधि तोकिएको छ । निर्वाचन आयोगको निर्णय अनुसार निर्वाचन आचारसंहिता मिति २०८१.०८/०२ गतेदेखि जारी भइसकेकोले उक्त आचारसंहिताको अक्षरशः पालना गरी निर्वाचन प्रचार प्रसारको कार्य गर्नु गराउनुहुन सम्बन्धित राजनीतिक दल, उम्मेदवार तथा निर्वाचन सरोकारवालाहरूलाई अनुरोध गर्दै मिति २०८१÷०८÷१७ गते आइतबारका दिन विहान ७ः०० बजेदेखि अपराह्न ५ः०० बजेसम्म सम्बन्धित मतदान केन्द्रमा मतदान हुने हुँदा मतदान कार्यमा सहभागी भई आफ्नो मताधिकार प्रयोग गर्न आयोगद्वारा जारी विज्ञप्ति मार्फ सम्बन्धित सबै मतदाताहरूमा हार्दिक आह्वान गरेकोछ ।
उम्मेदवारको अन्तिम नामावली विवरण यसैसाथ संलग्न गरिएको छ ।
उम्मेदवारको अन्तिम नामावली हेर्न यहाँ क्लिक गर्नुहोस
Add Comment