काठमाडौं । रसुवाको भोटेकोशी नदीमा भदौ १० गते आएको बाढीबाट क्षति पुगेका झोलुङ्गे पुलहरूको मर्मत तथा पुनर्निर्माण कार्यलाई सरकारले तीव्रता दिएको छ।
मुग्लिङदेखि टिमुरेसम्म रहेका ६४ वटा झोलुङ्गे पुलमध्ये बाढीका कारण ५३ वटामा क्षति पुगेको थियो। प्रभावित क्षेत्रको स्थलगत मूल्याङ्कनपछि तीमध्ये २० वटा पुल मर्मत गर्नुपर्ने निष्कर्ष निकालिएको सरकारी अधिकारीहरूले बताएका छन्।
ती २० वटा झोलुङ्गे पुलको मर्मतका लागि सरकारले भदौ १७ गते कार्यादेश जारी गरेको थियो। मर्मतको काम सुरु भइसकेको र केही पुलमा उल्लेख्य प्रगति भएको जनाइएको छ।
महेश दोभान–मास्टार, कालिकाथान, मलिङ्गा–मझुवाटार, केउरेनी–गहते तथा पिमलटार–जागराम खोला झोलुङ्गे पुलको मर्मत कार्य अघि बढिरहेको छ। यी पाँच वटा पुलको मर्मत एक महिनाभित्र सम्पन्न गर्ने लक्ष्य राखिएको छ।
बाढीबाट क्षति पुगेका बाँकी ३३ वटा झोलुङ्गे पुल भने पुनर्निर्माण गर्नुपर्ने अवस्थामा पुगेका छन्। ती पुलको पुनर्निर्माणका लागि सरकारले भदौ १७ गते नै बोलपत्र आह्वान गरिसकेको जनाएको छ।
बाढीले क्षति पुर्याएका पुलहरूको मर्मत तथा पुनर्निर्माण सम्पन्न भएपछि प्रभावित क्षेत्रमा स्थानीयको आवतजावत सहज हुने अपेक्षा गरिएको छ।
Add Comment