एजेन्सी । यमनमा सक्रिय इरानसमर्थित हुथी विद्रोही समूहले साउदी अरबको राजधानी रियादसहित लाल सागर क्षेत्रमा रहेका ऊर्जा तथा तेलसम्बन्धी संरचनालाई लक्षित गरी ड्रोन र ब्यालिस्टिक मिसाइल आक्रमण गरेको दाबी गरेको छ।
हुथी सैन्य प्रवक्ता याह्या अल–सारियाले रियादका संवेदनशील संरचना तथा लाल सागर किनारमा रहेको साउदी सरकारी तेल तथा ग्यास कम्पनी अराम्कोका सुविधालाई लक्षित गरी ठूलो संख्यामा ब्यालिस्टिक तथा क्रुज मिसाइल र ड्रोन प्रयोग गरिएको दाबी गरेका छन्।
तर साउदी अधिकारीहरूले रियादतर्फ प्रहार गरिएको एउटा ब्यालिस्टिक मिसाइललाई आफ्नो हवाई प्रतिरक्षा प्रणालीले रोकेर नष्ट गरेको बताएका छन्। अन्य स्थानमा थप आक्रमण भएको वा मानवीय क्षति भएको विषयमा भने तत्काल आधिकारिक पुष्टि भएको छैन।
शनिबार रियादस्थित किङ खालिद अन्तर्राष्ट्रिय विमानस्थल आसपास इन्धन भण्डारण ट्यांकीबाट कालो धुवाँ उठेको देखिएको थियो। घटनापछि विमानस्थलमा केही समय उडान प्रभावित भएको बताइएको छ। उडान ट्र्याकिङ वेबसाइट FlightRadar24 का अनुसार विमानस्थलमा ढिलाइ तथा केही उडान रद्द भएका थिए।
रियादमा लामो समयपछि पहिलोपटक हवाई आक्रमणसम्बन्धी चेतावनीसमेत जारी गरिएको थियो। साउदी नेतृत्वको गठबन्धनका प्रवक्ताका अनुसार बिश, ताइफ, फरासन र यान्बु क्षेत्रमा सर्वसाधारणलाई लक्षित गर्ने प्रयास पनि हवाई प्रतिरक्षामार्फत रोकिएको थियो।
हुथी प्रवक्ता सारियाले यमनको राजधानी सानामाथि साउदी पक्षबाट भइरहेको आक्रमणको प्रतिक्रियास्वरूप रियाद तथा अन्य क्षेत्रमा हमला गरिएको दाबी गरेका छन्। उनले पछिल्लो एक सातामा साउदी पक्षले यमनमा करिब ३०० पटक हवाई आक्रमण गरेको आरोपसमेत लगाएका छन्। यी दाबीहरूको स्वतन्त्र पुष्टि भने भएको छैन।
यमनमा हुथी विद्रोही र अन्तर्राष्ट्रिय रूपमा मान्यता प्राप्त सरकारबीच लामो समयदेखि द्वन्द्व जारी छ। साउदी अरबले यमन सरकारलाई समर्थन गर्दै आएको छ भने हुथी समूहले देशको ठूलो भूभागमा नियन्त्रण कायम गरेको छ।
घटनापछि अमेरिकी विदेश मन्त्रालयले मध्यपूर्वमा रहेका आफ्ना नागरिकलाई उच्च सतर्कता अपनाउन आग्रह गरेको छ। सम्भावित उडान रद्द तथा अन्य यात्रासम्बन्धी अवरोधका लागि तयार रहनसमेत अमेरिकी नागरिकलाई भनिएको छ।
अमेरिकी विदेश मन्त्रालयले हुथी समूहले साउदी अरबभित्रका लक्ष्य, नागरिक विमानस्थलसमेत, विरुद्ध गतिविधि गर्दै आएको उल्लेख गर्दै क्षेत्रीय सैन्य द्वन्द्व तीव्र रूपमा बढ्न सक्ने चेतावनी दिएको छ।
संयुक्त राष्ट्रसंघअन्तर्गतको अन्तर्राष्ट्रिय आप्रवासन संगठन (IOM) का अनुसार पछिल्लो द्वन्द्वका कारण यमनमा विस्थापित हुने मानिसको संख्या १ लाख ४ हजार ७९६ भन्दा बढी पुगेको छ।
यसैबीच, यमनमा हुथी र साउदीसमर्थित सरकारी सेनाबीचको पछिल्लो भिडन्तमा शनिबार मात्रै ४८ जनाको मृत्यु भएको अपुष्ट विवरण सार्वजनिक भएको छ। एएफपीका अनुसार हुथी पक्षले आफ्ना ३१ लडाकु मारिएको तथा सरकारी पक्षले १७ सैनिक गुमाएको दाबी गरेको छ।
क्षेत्रमा बढ्दो सैन्य तनावले तेल आपूर्ति र अन्तर्राष्ट्रिय ऊर्जा बजारमा समेत असर पार्न सक्ने चिन्ता बढेको छ। लगानी बैंक जेपी मोर्गनले समेत युद्धको तेल मूल्यमा पर्ने प्रभावबारे तत्काल स्पष्ट अनुमान गर्न कठिन रहेको जनाएको छ।
