काठमाडौं । प्रधानमन्त्री वालेन्द्र शाह संयुक्त राष्ट्रसंघको ८१औँ महासभामा सहभागी हुन अमेरिका प्रस्थान गरेपछि अर्थमन्त्री डा. स्वर्णिम वाग्लेले कार्यवाहक प्रधानमन्त्रीको जिम्मेवारी सम्हाल्ने भएका छन्।
प्रधानमन्त्री शाहको अनुपस्थितिमा सरकारका दैनिक प्रशासनिक काम सञ्चालन गर्ने जिम्मेवारी वाग्लेलाई दिइएको हो। प्रधानमन्त्री शाहको सिफारिसमा राष्ट्रपति रामचन्द्र पौडेलले वाग्लेलाई उक्त जिम्मेवारी तोकेको राष्ट्रपति कार्यालयसम्बन्धी विवरणमा उल्लेख छ।
प्रधानमन्त्री शाह मंगलबार साँझ ७ बजे न्यूयोर्कतर्फ प्रस्थान गरेका हुन्। उनी संयुक्त राष्ट्रसंघको ८१औँ महासभाको उच्चस्तरीय सत्रमा नेपाली प्रतिनिधिमण्डलको नेतृत्व गर्दै अमेरिका गएका हुन्।
प्रधानमन्त्री शाहले सेप्टेम्बर २४ अर्थात् असोज ८ गते संयुक्त राष्ट्रसंघको महासभालाई सम्बोधन गर्ने कार्यक्रम छ। त्यस क्रममा उनले संयुक्त राष्ट्रसंघका महासचिव एन्टोनियो गुटेरेससँग भेटवार्ता गर्ने कार्यक्रमसमेत रहेको परराष्ट्र मन्त्रालयले जनाएको छ।
प्रधानमन्त्री शाह सेप्टेम्बर २६ अर्थात् असोज १० गते नेपाल फर्कने तालिका रहेको छ। उनको स्वदेश फिर्तीसम्म वाग्लेले प्रधानमन्त्रीको दैनिक प्रशासनिक जिम्मेवारी सम्हाल्नेछन्।
