काठमाडौं । नेपाली कांग्रेसको १५औँ महाधिवेशनअन्तर्गत विभिन्न जिल्लामा अधिवेशनको प्रक्रिया अघि बढेको छ।
कांग्रेस केन्द्रीय कार्यसमितिको निर्णयअनुसार आगामी असोज १६ देखि १९ गतेसम्म १५औँ महाधिवेशन हुँदैछ। त्यसअन्तर्गत वडा अधिवेशन सम्पन्न भइसकेको छ भने गाउँ तथा नगर अधिवेशन पनि जारी छ।
कांग्रेसका अनुसार असोज १० देखि १३ गतेसम्म सञ्चालन हुने प्रदेश सभा क्षेत्रीय तथा प्रतिनिधि सभा क्षेत्रीय अधिवेशनअन्तर्गत मनाङ, मुस्ताङ र बैतडीमा अधिवेशन सम्पन्न भइसकेको छ।
त्यस्तै संखुवासभा, धनकुटा, उदयपुर, चितवन, ललितपुर, कपिलवस्तु, रुकुम पूर्व, रोल्पा, रुकुम पश्चिम, जुम्ला, डोटी, दार्चुला, डडेल्धुरा र कञ्चनपुरमा उद्घाटन सत्र सुरु भई निर्वाचन प्रक्रिया अघि बढिरहेको कांग्रेसले जनाएको छ।
कांग्रेसको १५औँ महाधिवेशनका लागि निर्धारित कार्यतालिकाअनुसार बाँकी अधिवेशनहरू पनि क्रमशः सम्पन्न गर्ने प्रक्रिया अघि बढाइएको छ।
