काठमाडौं । स्वयम्भू क्षेत्रको सम्पदा, स्वास्थ्य र सामुदायिक एकतालाई खेलकुदसँग जोड्ने उद्देश्यले आयोजना हुन लागेको ‘आठौँ स्वयम्भू रन–२०२७’ को अनलाइन दर्ता आज बिहान ७ बजेदेखि खुला गरिएको छ। दौडमा सहभागी हुन इच्छुक खेलाडी तथा सर्वसाधारणले अनलाइन फाराम भरेर सहभागिता जनाउन सक्नेछन्।
स्वयम्भू एथलेटिक्स ट्रेनिङ क्लबले यसअघि पनि नेपालका विभिन्न क्षेत्रमा दौड तथा खेलकुदसम्बन्धी कार्यक्रम आयोजना गर्दै आएको छ। खेलकुदको प्रवर्द्धन, स्वस्थ जीवनशैलीको विकास र समुदायमा दौड संस्कृतिको विस्तार गर्ने उद्देश्यले क्लबले विभिन्न क्षेत्रमा यस्ता गतिविधि सञ्चालन गर्दै आएको हो। यसपटक भने क्लबले eHeraldPost.com सँग सहकार्य गर्दै आठौँ स्वयम्भू रन–२०२७ आयोजना गर्न लागेको हो। कार्यक्रमको व्यवस्थापन लाया मिडिया प्रा. लि.ले गर्नेछ।
आगामी २०८३ पुस २५ गते शनिबार (९ जनवरी २०२७) आयोजना हुने यस संस्करणमा ४.६ किलोमिटर दूरीको फन रन सञ्चालन गरिनेछ। दौडमा खेलकुदमा रुचि भएका विभिन्न उमेर समूहका इच्छुक व्यक्ति तथा सर्वसाधारणले सहभागिता जनाउन सक्नेछन्। प्रतियोगितामा सहभागी हुन पाँच सय रुपैयाँ दर्ता शुल्क तोकिएको छ।
दौड स्वयम्भूस्थित भगवानपाउबाट सुरु हुनेछ। निर्धारित रुटअनुसार सहभागीहरू किमडोल, छाउनी अस्पताल, छाउनी चोक, सीतापाइला, बुद्धपार्क र बारुदखाना हुँदै पुनः भगवानपाउमै पुगेर दौड पूरा गर्नेछन्। यसरी स्वयम्भू क्षेत्रका विभिन्न स्थान समेटिने रुटमार्फत सहभागीले दौडसँगै क्षेत्रको सांस्कृतिक तथा ऐतिहासिक परिवेशको अनुभवसमेत लिन सक्नेछन्।
दौडमा सहभागी हुनेहरूलाई बिब नम्बर तथा टी–सर्ट २०८३ पुस २४ गते शुक्रबार (८ जनवरी २०२७) वितरण गरिनेछ। अनलाइन दर्ता खुलिसकेकाले इच्छुक सहभागीलाई समयमै फाराम भरी आफ्नो सहभागिता सुनिश्चित गर्न आयोजकले आग्रह गरेको छ।
आठौँ स्वयम्भू रनले नियमित दौड तथा शारीरिक व्यायामप्रति जनचेतना बढाउनुका साथै स्वयम्भू क्षेत्रको ऐतिहासिक, सांस्कृतिक र सम्पदागत पहिचानलाई प्रवर्द्धन गर्ने लक्ष्य राखेको छ। ‘सम्पदा, स्वास्थ्य र समुदायका लागि दौड’ भन्ने सन्देशसहित आयोजना हुन लागेको यस कार्यक्रमले स्थानीय समुदाय, युवा, खेलप्रेमी तथा सर्वसाधारणलाई एउटै साझा गतिविधिमा जोड्ने अपेक्षा गरिएको छ।
यसैबीच, कार्यक्रमलाई सफलतापूर्वक सम्पन्न गर्न सहयोग गर्न इच्छुक व्यक्ति, संस्था तथा व्यवसायीहरूलाई प्रायोजन (स्पोन्सरशिप) का लागि आयोजकले आह्वान गरेको छ। खेलकुद, स्वास्थ्य, पर्यटन तथा स्थानीय सम्पदाको प्रवर्द्धनमा योगदान दिन चाहने व्यक्ति तथा संस्थाले कार्यक्रमसँग सहकार्य गर्न सक्नेछन्। प्रायोजनमार्फत आफ्नो संस्था वा व्यवसायलाई खेलकुद तथा समुदायसँग जोड्ने अवसरसमेत प्राप्त हुनेछ।
कार्यक्रम विवरण:
- कार्यक्रम: आठौँ स्वयम्भू रन–२०२७
- मिति: २०८३ पुस २५ गते, शनिबार (९ जनवरी २०२७)
- अनलाइन दर्ता: आज बिहान ७ बजेदेखि खुला
- बिब नम्बर तथा टी–सर्ट वितरण: पुस २४ गते, शुक्रबार (८ जनवरी २०२७)
- दौड दूरी: ४.६ किलोमिटर फन रन
- दर्ता शुल्क: रु. ५००
- सुरु तथा अन्तिम स्थान: स्वयम्भू भगवानपाउ
- दौडको रुट: भगवानपाउ → किमडोल → छाउनी अस्पताल → छाउनी चोक → सीतापाइला → बुद्धपार्क → बारुदखाना → भगवानपाउ
- आयोजक: eHeraldPost.com तथा स्वयम्भू एथलेटिक्स ट्रेनिङ क्लब
- व्यवस्थापन: लाया मिडिया प्रा. लि.
सहभागिता तथा प्रायोजनका लागि
दौडमा सहभागी हुन इच्छुकले आयोजकले उपलब्ध गराएको अनलाइन फाराममार्फत दर्ता गर्न सक्नेछन्। कार्यक्रमलाई सहयोग तथा प्रायोजन गर्न इच्छुक व्यक्ति, संस्था र व्यवसायीले पनि आयोजकसँग सम्पर्क गरी सहकार्य गर्न सक्नेछन्।
“यो लिंकमा क्लिक गरेर फारम भर्न सक्नुहुन्छ ?”
