तालिम सञ्चालन गर्ने सहमति पत्रमा एकै पटक २३ वटा कलेजसँग हस्ताक्षर : सबै कलेजहरुसँग सहकार्य गर्ने विभागको योजना

काठमाडौँ । काठमाडौँ महानगरपालिकाको सामाजिक विकास विभागले सरकारी र निजी गरेर २० वटा क्याम्पसहरुसँग सिपमूलक तालिम सञ्चालन स्थलका लागि सहमति पत्रमा हस्ताक्षर गरेको छ । विभागका निमित्त प्रमुख बिमला कोइराला र सम्बन्धित कलेजका पदाधिकारीहरुले सम्झौतामा हस्ताक्षर गरेको छ ।

महानगरपालिकाले चालु आर्थिक बर्षदेखि १० वटा महानगर गौरव योजना कार्यान्वयनमा ल्याएको छ । यीमध्ये ‘रोजगारी र आय वृद्धि, काठमाडौँको समृद्धि’ कार्यक्रम एउटा हो । यो कार्यक्रममा रोजगारमूलक सिप विकास तालिम सञ्चालन हुन्छन् । यस्ता विविध विधाका तालिम सञ्चालन गर्न सम्झौता भएको हो । सामाजिक विकास विभागले कार्यान्वयन गर्ने यस कार्यक्रममा सिप नजानेका र सिपको स्तरोन्नति गर्नुपर्ने व्यक्तिलाई सिप सिकाउने तथा सिपको स्तरोन्नति गराइनेछ । १५ हजार व्यक्तिलाई तालिम दिने र ५ हजार जनालाई प्रत्यक्ष रोजगारीमा आवद्ध गराउने कार्यक्रमको लक्ष्य हो ।

सम्झौताबमोजिम कलेजहरुले कक्षा कोठा (स्थान) र प्रयोगशाला निःशुल्क उपलब्ध गराउनेछन् । प्रशिक्षक तथा जनशक्ति र मर्मत सम्भार खर्च महानगरपालिकाले उपलब्ध गराउनेछ । यसका लागि कलेजहरुले महानगरपालिकामा लागत अनुमान पेश गर्नुपर्नेछ । तालिमको संयोजन र सहजीकरण महानगरपालिकाबाट खटाइएका तालिम संयोजकहरुले गर्नेछन् ।

सिपमूलक तालिम लिनका लागि अहिलेसम्म करिब १० हजार व्यक्तिको आवेदन प्राप्त भइसकेको छ । सूचना प्रविधिमा आधारित तालिममा धेरै व्यक्तिहरुको चासो छ । सहरी योजना आयोगका सदस्य इञ्जिनियर शैलेन्द्र झाले कार्यक्रमका बारेमा प्रस्तुतिकरण गर्दै भने, ‘६९.७ प्रतिशत पुरुष र ३०.३ प्रतिशत महिला आवदेकमध्ये ४७.९ प्रतिशत बागमती प्रदेशबाट रहेकाछन् । यस्तै मधेश प्रदेशबाट १२.१, कोशी प्रदेशबाट १२ प्रतिशत, सुदुरपश्चिमबाट ८.५ प्रतिशत रहेकाछन् । उनिहरुमध्ये पनि ८०.६ प्रतिशत बागमती प्रदेशमा बसोबास गरिरहेका छन् ।’
१२ कक्षा उत्तीर्ण शैक्षिक योग्यता भएका आवेदकको संख्या सबैभन्दा धेरै ४८.२ प्रतिशत छ । निरक्षर ३० प्रतिशत, एसईई वा एसएलसी उत्तीर्ण ९.८ प्रतिशत, स्नातकोत्तर ८.३ प्रतिशत हुनुहुन्छ । २४.१ प्रतिशतले यसअघि नै तालिम लिनुभएको छ । ७५.९ प्रतिशतले कुनै तालिम लिएको छैन ।

तालिम लिनेमध्ये १ बर्षभन्दा धेरै तालिम गरिसक्नुभएका आवेदकको संख्या १५.५ प्रतिशत छ । १८.९ प्रतिशतले १ महिनाभन्दा कम अवधिको, १९.१ प्रतिशतले ३ महिनादेखि १ बर्षसम्मको, ९.५ प्रतिशतले ६ महिनादेखि १ बर्षसम्मको तालिम लिनुभएको झाले जानकारी दिए ।
विभागका निमित्त प्रमुख कोइरालाका अनुसार महानगरपालिकामा बसोबास गरिरहेका (स्थायी, अस्थायी बसोबासी तथा करदाता समेत) व्यक्ति, फोहोर व्यवस्थापन हुँदै आएको ल्याण्डफिल साइट प्रभावित क्षेत्रका बासिन्दा प्राथमिक लक्षित वर्ग रहेकाछन् । बेरोजगार, युवा (महिला, पुरुष), रोजगारी गुमाएर बसेकाहरु, विदेशवाट सिप सिकेर तथा काम गरेर फर्केका (अहिले काम खोज्दै गरेका) व्यक्तिलाई सबैलाई तालिमको अवसर प्रदान गरिनेछ ।

महानगरपालिकाभित्र १०५ वटा व्यवस्थापन र १२५ वटा प्राविधिक धारका क्याम्पसको नामावली प्राप्त भएको छ । कार्यक्रमका फोकल पर्सन शान्ता पहाडी भन्छीन, ‘तालिम सञ्चालन गर्नु अघि हामीले उद्योग वाणिज्य क्षेत्रका प्रतिनिधिहरुसँग छलफल गरिसकेका छौँ । यसपछि उद्योग क्षेत्रमा चाहिने आवश्यक जनशक्तिको पहिचानका लागि सरोकारवालासँग छलफल गर्नेछौँँ ।’

महानगरपालिकासँग शैक्षिक संघसंस्थाहरुले अनुसन्धानमूलक, ढाँचा निर्माणलगायत विविध क्षेत्रमा सहकार्यं गर्न सकिन्छ । हामी यसका लागि उत्साहित छौँ । इञ्जिनियरिङ् अध्ययन संस्थान, थापाथलीको अनुसन्धान तथा विकास एकाइ प्रमुख प्रदिप अधिकारीले भने, ‘नविनतम सोचलाई सामाजिक रुपमा अभ्यस्त गराउन हामीजस्ता शैक्षिक संस्थाहरुले योगदान दिन सक्छौँ ।’

तालिम लिन कसरी फाराम भर्ने
चालु आर्थिक बर्षबाट कार्यान्वयनमा आएको यो कार्यक्रममा सहभागी हुन गएको असोज २२ गते सार्वजनिक सूचनाबाट इच्छुक व्यक्तिहरुलाई फाराम भर्न आव्हान गरिएको छ । अनलाइन फाराममा आफूले तालिम लिन चाहेको विधा छान्न सकिन्छ । अनलाइनमा पहुँच नहुनेका लागि अन्य विधाका तालिम लिन वडा कार्यालयमा गएर फाराम भर्न सकिने व्यवस्था मिलाइएको छ ।

फाराममा इच्छुक व्यक्तिले नाम थर, शैक्षिक योग्यता, हाल सम्लग्न पेशा, तालिम लिएको भए विवरण, अनुभव कुन क्षेत्रमा छ, काठमाडौँ महानगरपालिकाका जनप्रतिनिधि वा कर्मचारीको परिवार हो कि होइन, ल्याण्डफिल साइट प्रभावित क्षेत्रको बासिन्दा हो कि होइन, महानगरपालिकामा स्थायी बसोबास गर्नुहुन्छ कि हुन्न, महिलाहरुका हकमा एकल हो कि होइन, जस्ता विवरण भर्नुपर्छ ।

शारीरिक अपाङ्गता छ भने कस्तो खालको अवस्था हो जस्ता विवरण, फारामबाट माग गरिएका छन् । फाराम भर्नेले यी बिधामध्ये आफूलाई रुचि लागेको क्षेत्रलाई १ त्यसपछिको रुचिको क्षेत्रलाई क्रमशः २, ३, ४ र ५ नम्बर दिनुपर्नेछ ।

तालिमका विधाहरु
१) प्रोफेसनल कम्प्युटर हार्डवेयर नेटवर्किङ् तथा सीसीटिभी क्यामरा जडान तथा मर्मत तालिम
२) सफ्टवेयर डिभलपमेन्ट तालिम
३) प्रोफेसनल इलेक्ट्रिसियन एण्ड प्लम्बिङ् तालिम
४) सिलाइ कटाइ तथा फेसन डिजाइनिङ् तालिम
५) कन्स्ट्रक्सन लेवर तथा मिस्त्री तालिम
६) व्युटी पार्लर तथा सैलुन तालिम
७) मोटरसाइकल रिपेयर मेन्टिनेन्स तालिम
८) लाइट भेहिकल मेन्टिनेन्स तालिम
९) कार्पेन्टर तथा इन्टेरियर डिजाइनिङ् तालिम
१०) हस्तकला तथा मूर्तिकला तालिम
११) आकाशे पानी संकलन तथा रिजर्व वोरिङ् तालिम
१२) सरसफाइ तथा माली तालिम
१३) कौसी खेती (भर्टिकल फार्मिङ्) तालिम
१४) हेभी इक्वीपमेन्ट अपरेटर (ब्लाक व्हो, लोडर, एक्साभेटर) तालिम
१५) फास्टफुड/चाइनिज र इन्डियन कुक तालिम
१६) बारिस्ता /बेकरी तालिम
१७) बार ट्रेण्डिङ्वे/टर/वेट्रिस तालिम
१८) होम एप्लाइन्सेस मर्मत तालिम
१९) अनलाइन रोजगार (जब) तालिम
२०) सम्पदा निर्माण तथा मर्मत तालिम
२१) प्रोसेसनल अकान्टिङ् तालिम
२२) रिसेप्सनिष्ट तथा क्यासियर तालिम
२३) मार्केटिङ् तथा डिजिटल मार्केटिङ् तालिम
२४) ग्राफिक्स डिजाइन भिडियोग्राफी तथा भिडियो इडिटिङ्
२५) एल्मुनियम, युपीभीसी, फेब्रिकेसन तालिम
२६) टुटिस्ट गाइड तालिम
२७) सेक्युरिटी गार्ड तालिम
२८) स्पा तथा थेरापी तालिम
२९) लघु उद्यम विकास सहजकर्ता तालिम
३०) जुत्ता बनाउने तालिम
३१) सहकारी व्यवस्थापक तालिम
३२) गरगहना बनाउने तालिम
३३) विभिन्न खेलकुदका लागि
३४) साइबर सेक्युरिटी
३५) अन्य तालिमका लागि
तालिममा भाग लिन चाहनेहरुले वडा कार्यालयमा सम्पर्क गरेर वा अनलाइन फारामबाट आवेदन दिन सकिन्छ ।