कंगोमा कारागारबाट भाग्न खोज्दा १२९ कैदीको मृत्यु, कैयौं घाइते

किन्सासा (कङ्गो), भाद्र १८ । कङ्गोको राजधानीको मुख्य कारागारबाट भाग्न खोज्दा १२९ कैदीको मृत्यु भएको छ । तीमध्ये अधिकांशले भागदौडमा धेरधत्रमज्यान गुमाएका छन् । अधिकारीहरुले मंगलबार सो जानकारी दिएका हुन् । कङ्गोका आन्तरिक मन्त्री ज्याकमिन शाबानीले सोशल मिडिया प्लेटफर्ममा सेनाले चलाएको गोलीका कारण २२ कैदीको मृत्यु भएको बताए ।

ज्याकमिन शबानीले भने, ‘घटनामा ५९ जना घाइते भएका छन् र उनीहरुको सरकारले उपचार गरिरहेको छ । यसका साथै केही महिला बलात्कारका घटना पनि बाहिर आएका छन् । उनले कारागारमा शान्तिसुरक्षा कायम भएको बताए । घटनामा कारागारको एक भागमा आगजनी भएको थियो । मानवअधिकार संगठन एम्नेस्टी इन्टरनेशनलले देशको बारेमा हालैको आफ्नो प्रतिवेदनमा माकाला जेल कंगोको मुख्य कारागार भएको बताएको छ, जसमा १,५०० कैदी राख्ने क्षमता छ तर यसमा १२,००० कैदीहरू छन्। धेरैजसो सुनुवाइको पर्खाइमा छन् ।

विगतमा पनि कारागार तोडेर कैदी फरार भएका घटना भएका छन् । यसमा २०१७ को घटना पनि समावेश छ जसमा एक धार्मिक सम्प्रदायले सयौं कैदीहरूलाई मुक्त गरेको थियो । आइतबार मध्यरातबाट सुरु भएको गोलीबारी सोमबार बिहानसम्म जारी रहेको स्थानीयले बताएका छन् । एक वरिष्ठ अधिकारीले बताए अनुसार घटनामा दुई जनाको मात्र मृत्यु भएको पुष्टि भएको थियो, यो तथ्याङ्क मानव अधिकार कार्यकर्ताहरूले विवादित बनाएको छ । जेलबाट सार्वजनिक भएको भिडियोमा शव भुइँमा लडिरहेको देखिन्छ । उनीहरुमध्ये धेरैको शरीरमा चोटपटकको निशान छ । अन्य भिडियोहरूमा कैदीहरूले मारिएका कैदीहरूको शव गाडीमा हालेको देखिन्छ । जेलमा जबरजस्ती प्रवेश गर्ने कुनै संकेत थिएन । राष्ट्रपति भवनबाट पाँच किलोमिटरको दूरीमा सहरको मध्यभागमा रहेको कारागार छ ।

मन्त्री एम्बेम्बा काबुयाले स्थानीय ’टप कंगो एफएम रेडियो’ लाई बताए अनुसार जेल तोड्ने योजना जेलका कैदीहरूले नै बनाएको जस्तो देखिन्छ । आक्रमणपछि कारागारतर्फ जाने बाटोमा घेराबन्दी गरिएको छ भने अधिकारीहरूले घटनाको छानबिन गर्न समिति गठन गरेका छन् । न्याय मन्त्री कन्स्टेन्ट मुताम्बाले आक्रमणलाई “जेलबाट बाहिर निकाल्ने पूर्वनियोजित षडयन्त्र“ भनेका छन् । उनले कारागारबाट कैदी ओसारपसारमा रोक लगाउने घोषणा गर्दै प्रशासनले कारागारमा हुने भीडभाड घटाउनका लागि अन्य पहलका साथै नयाँ कारागार निर्माण गर्ने बताए ।