काठमाडौं । अमेरिका र इरानबीच जारी सैन्य तनाव थप चर्किएको छ। अमेरिकी सेनाले इरानका सैन्य लक्ष्यहरूमा लगातार १३औँ रात पनि हवाई आक्रमण गरेको जनाएको छ। अमेरिकी सेनाको केन्द्रीय कमाण्ड (CENTCOM) का अनुसार आक्रमणको उद्देश्य इरानको सैन्य क्षमता कमजोर बनाउनु तथा अन्तर्राष्ट्रिय समुद्री व्यापारिक मार्गमा देखिएको सुरक्षा जोखिम कम गर्नु रहेको छ।
पछिल्ला केही दिनयता दुवै पक्षबीच आक्रमण र प्रतिआक्रमण जारी रहेकाले मध्यपूर्वको सुरक्षा अवस्था थप जटिल बन्दै गएको अन्तर्राष्ट्रिय सञ्चारमाध्यमहरूले जनाएका छन्। अमेरिकी आक्रमणपछि इरानका विभिन्न क्षेत्रमा विस्फोट भएको खबर सार्वजनिक भएको छ भने इरान समर्थित समूहहरूको गतिविधि पनि बढेको बताइएको छ।
यसैबीच, संयुक्त राष्ट्रसंघले युद्ध थप फैलिन सक्ने जोखिमप्रति चिन्ता व्यक्त गर्दै दुवै पक्षलाई संयमता अपनाउन र कूटनीतिक वार्तामार्फत समाधान खोज्न आग्रह गरेको छ। महासचिव एन्टोनियो गुटेरेसले मध्यपूर्वको अवस्था “अत्यन्तै संवेदनशील” बनेको चेतावनी दिएका छन्।
युद्धका कारण अन्तर्राष्ट्रिय तेल बजार पनि प्रभावित भएको छ। लाल सागर र हर्मुज जलडमरूमध्य आसपासको सुरक्षा जोखिम बढेपछि कच्चा तेलको मूल्य उकालो लागेको छ। विश्लेषकहरूले द्वन्द्व अझ लम्बिए विश्व ऊर्जा आपूर्ति, अन्तर्राष्ट्रिय व्यापार तथा अर्थतन्त्रमा गम्भीर असर पर्न सक्ने बताएका छन्।
अन्तर्राष्ट्रिय समुदायले दुवै पक्षलाई युद्ध विस्तार नगर्न आग्रह गरिरहेको भए पनि हालसम्म तनाव कम हुने स्पष्ट संकेत देखिएको छैन। कूटनीतिक प्रयास जारी रहे पनि युद्धविरामको सम्भावना अझै अनिश्चित रहेको बताइएको छ।
Add Comment