काठमाडौं । देशभर राष्ट्रिय धान दिवस मनाइँदै छ भने घरघरमा खीर पकाएर पर्वको रौनक थपिएको छ। किसानहरू खेतमा धान रोपाइँमा व्यस्त छन् भने परिवारका सदस्यहरू सँगै बसेर खीर खाने परम्परा पनि निभाइँदै छ।
असार १५ नेपाली किसानका लागि विशेष महत्व बोकेको दिन हो। यही दिनबाट धान रोपाइँले गति लिने विश्वास रहिआएको छ। देशका अनेक स्थानमा सामूहिक रोपाइँ, हिलो खेल्ने तथा किसानलाई सम्मान गर्ने कार्यक्रम आयोजना गरिएका छन्।
यस दिन खीर खाने परम्पराको पनि विशेष महत्व छ। असार महिनामा गाई–भैँसीले पर्याप्त हरियो घाँस पाएपछि दूध उत्पादन बढ्ने र नयाँ धानको सिजन सुरु हुने भएकाले दूध, चामल र चिनीबाट बनाइने खीर समृद्धि, शुभकामना र राम्रो उत्पादनको प्रतीकका रूपमा खाने चलन बसेको जनविश्वास छ।
धान नेपालको प्रमुख खाद्यान्न बाली भएकाले राष्ट्रिय धान दिवसले किसानको श्रम, कृषि उत्पादन र खाद्य सुरक्षाको महत्वलाई उजागर गर्ने विश्वास गरिन्छ। सरकारले पनि हरेक वर्ष यस अवसरमा कृषि प्रवर्द्धन र किसानको सम्मानका कार्यक्रम सञ्चालन गर्दै आएको छ।
असार १५ केवल एउटा पर्व मात्र होइन, किसानको पसिना, मेहनत र अन्न उत्पादनप्रतिको सम्मान व्यक्त गर्ने दिनका रूपमा पनि मनाइँदै आएको छ।
Add Comment