काठमाडौं । पाकिस्तानको काराकोरम हिमशृङ्खलास्थित विश्वको १२औँ अग्लो ब्रड पिक (८,०४७ मिटर) आरोहणका क्रममा गएको हिमपहिरोमा बेपत्ता भएका १० पर्वतारोहीमध्ये चार जनाको शव फेला परेको छ। बाँकी छ जनाको खोजी तथा उद्धार कार्य जारी रहेको पाकिस्तानी अधिकारीहरूले जनाएका छन्।
पाकिस्तानको अल्पाइन क्लबका अनुसार बिहीबार शिखरतर्फ अघि बढिरहेका पर्वतारोहीहरूको टोलीसँग आधार शिविरको सम्पर्क विच्छेद भएको थियो। त्यसपछि सुरु गरिएको खोजी अभियानमा खराब मौसमले चुनौती थपेको छ।
बेपत्ता हुनेमा पाँच नेपाली, एक पाकिस्तानी, एक ओमानी, एक अमेरिकी, एक चिनियाँ तथा अर्का एक विदेशी पर्वतारोही रहेका छन्। पाकिस्तानस्थित नेपाली दूतावास र परराष्ट्र मन्त्रालयले पनि बेपत्ता हुनेमध्ये छ जना नेपाली रहेको पुष्टि गर्दै उद्धारका लागि पाकिस्तानी पक्षसँग समन्वय भइरहेको जनाएको छ।
उक्त आरोहण टोलीको नेतृत्व विश्वप्रसिद्ध नेपाली पर्वतारोही निर्मल पुर्जा (निम्स दाइ) ले गरिरहेका थिए। उनी अक्सिजनबिनै विश्वका १४ वटा ८ हजार मिटरभन्दा अग्ला हिमाल दोस्रो पटक आरोहण गर्ने अभियानमा थिए।
फेला परेका चार शवको औपचारिक पहिचान र उद्धार प्रक्रिया भने अझै जारी रहेको छ। हिमपहिरो र मौसममा हुने तीव्र परिवर्तनका कारण उत्तरी पाकिस्तानका हिमाली क्षेत्रमा यस्ता दुर्घटना हुने गरेका छन्।
Add Comment