किएभ । रुसले युक्रेनको राजधानी किएभ तथा आसपासका क्षेत्रमा रातभर दर्जनौँ क्षेप्यास्त्र र ड्रोनबाट भीषण हवाई आक्रमण गरेको छ। घण्टौँसम्म चलेको उक्त आक्रमणमा कम्तीमा १४ जनाको मृत्यु भएको युक्रेनी अधिकारीहरूले बताएका छन्।
युक्रेनी राष्ट्रपति भोलोदिमिर जेलेन्स्कीका अनुसार आक्रमणमा करिब ४० जना घाइते भएका छन्। हवाई आक्रमणको चेतावनी बिहानसम्म जारी रहेको थियो।
युक्रेनी वायुसेनाका अनुसार रुसले ब्यालिस्टिक तथा क्रुज क्षेप्यास्त्रसँगै तीव्र गतिमा उड्ने जेट–इन्जिनयुक्त ड्रोनसमेत प्रयोग गरेको थियो। आक्रमणका कारण किएभका विभिन्न क्षेत्रमा रातभर विस्फोटका आवाज सुनिएका थिए।
युक्रेनी अधिकारीहरूका अनुसार किएभ मुख्य निशाना भए पनि देशका विभिन्न २८ स्थानमा आक्रमणका असर देखिएका छन्। किएभका डार्नित्स्की, स्वियातोसिन्स्की र सोलोमियान्स्की जिल्लाका कम्तीमा १२ स्थानमा क्षति पुगेको बताइएको छ।
आक्रमणबाट आवासीय भवन, स्वास्थ्य संस्था तथा शैक्षिक संस्थामा क्षति पुगेको छ। उद्धार टोलीले भग्नावशेषमा फसेका मानिसहरूको खोजी तथा उद्धार गरेको छ।
युक्रेनले रुससँगको युद्धमा अमेरिकी निर्मित प्याट्रियट हवाई रक्षा प्रणालीका इन्टरसेप्टरको अभाव झेलिरहेको छ। पछिल्ला महिनाहरूमा रुसले किएभमाथि ब्यालिस्टिक क्षेप्यास्त्र प्रयोग गरेर आक्रमण तीव्र बनाएको युक्रेनी पक्षको भनाइ छ। राष्ट्रपति जेलेन्स्कीले थप प्याट्रियट इन्टरसेप्टर उपलब्ध गराउन अन्तर्राष्ट्रिय समुदायसँग आग्रह गर्दै आएका छन्।
जेलेन्स्कीले सामाजिक सञ्जालमार्फत रुसले लामो समयदेखि आक्रमणको तयारी गरेको र ब्यालिस्टिक तथा क्रुज क्षेप्यास्त्र र ड्रोनलाई एकैसाथ प्रयोग गरी नागरिक पूर्वाधारमा ठूलो क्षति पुर्याउने उद्देश्य राखेको आरोप लगाएका छन्।
तर, रुसको रक्षा मन्त्रालयले भने आक्रमणमा किएभस्थित युक्रेनको क्रुज क्षेप्यास्त्र निर्माणसँग सम्बन्धित औद्योगिक स्थललाई निशाना बनाइएको दाबी गरेको छ। साथै ड्रोन उत्पादन तथा भण्डारण स्थल, गोलाबारुद भण्डार र लजिस्टिक केन्द्रमा समेत आक्रमण गरिएको रुसी पक्षले जनाएको छ।
यसैबीच, युक्रेनले पनि रातभर रुसका विभिन्न क्षेत्रमा ठूलो संख्यामा ड्रोन आक्रमण गरेको रुसी रक्षा मन्त्रालयले जनाएको छ। मन्त्रालयका अनुसार रुसी हवाई रक्षा प्रणालीले विभिन्न रुसी क्षेत्र, क्रिमिया तथा कालो र आजोभ समुद्र क्षेत्रमा ७२६ युक्रेनी ड्रोन खसालेको दाबी गरेको छ। त्यसबाट भएको क्षति वा मानवीय हताहतीबारे तत्काल विस्तृत विवरण सार्वजनिक भएको छैन।
युरोपेली मुलुकमा पनि सुरक्षा सतर्कता
किएभमाथिको रुसी आक्रमणपछि युक्रेनसँग सीमा जोडिएका युरोपेली मुलुकहरूमा समेत सुरक्षा सतर्कता बढाइएको छ।
रुसको आक्रमण भइरहेका बेला पोल्यान्डले आफ्नो सैन्य विमान, हवाई रक्षा प्रणाली तथा राडार निगरानी सक्रिय गरेको जनाएको छ। पोल्यान्ड र नेटोका अन्य सैन्य विमानले आफ्नो हवाई क्षेत्रको निगरानी गरेका थिए।
रोमानियाको रक्षा मन्त्रालयका अनुसार युक्रेनसँगको सीमाना नजिकै एक अज्ञात ड्रोन बस्ती नभएको क्षेत्रमा खसेर आगलागी भएको थियो। रोमानियामा हवाई सुरक्षा अभियानमा खटिएका दुई स्पेनी F-18 लडाकु विमानसमेत सीमाक्षेत्रमा देखिएका हवाई लक्ष्यको निगरानीका लागि परिचालन गरिएको थियो।
यस्तै, मोल्डोभाको रक्षा मन्त्रालयले पनि आफ्नो हवाई क्षेत्रमा अनुमति नलिएको ड्रोन प्रवेश गरेको जनाएको छ।
आवासीय क्षेत्रमा ठूलो क्षति
किएभका विभिन्न आवासीय क्षेत्रमा भएको आक्रमणबाट घरका झ्यालहरू फुटेका छन् भने केही भवनमा आगलागी भएको छ। उद्धारकर्मीहरूले भग्नावशेषमा फसेका मानिसहरूको खोजी गरेका छन्।
डार्नित्स्की, स्वियातोसिन्स्की र सोलोमियान्स्की जिल्लामा आवासीय भवन, स्वास्थ्य संस्था र विद्यालयमा क्षति पुगेको बताइएको छ। सोलोमियान्स्की जिल्लामा नौ तले आवासीय भवनको माथिल्ला दुई तला ध्वस्त भएको तथा अन्य तल्लामा समेत आगलागी भएको अधिकारीहरूले बताएका छन्।
घटनास्थलमा उद्धार कार्य जारी रहँदा स्थानीयवासीमा त्रास र शोक छाएको छ। एक स्थानीय महिला लारिसा बोन्डारुकले आफ्नो अपार्टमेन्टमा ठूलो क्षति पुगेको र छिमेकीको नाति भग्नावशेषमा फसेर मृत्यु भएको बताएकी छन्।
रुस र युक्रेनबीच लामो समयदेखि जारी युद्धमा दुवै पक्षले एकअर्काका सैन्य तथा पूर्वाधारलाई लक्षित गर्दै ड्रोन र क्षेप्यास्त्र आक्रमण तीव्र बनाउँदै आएका छन्। पछिल्लो आक्रमणले युद्धको प्रभाव युक्रेनको राजधानी तथा आसपासका नागरिक क्षेत्रमा अझ गम्भीर बन्दै गएको देखाएको छ।
Add Comment