काठमाडौं । भोटेकोशी बाढीपछि जारी खोज, उद्धार तथा राहत अभियानअन्तर्गत हालसम्म १ हजार ३ सय ५५ जनाको मृत्यु भएको तथ्यांक सार्वजनिक गरिएको छ। २०८३ साल भदौ २२ गते बिहान ११ बजेसम्मको अपडेटअनुसार विभिन्न जिल्लाबाट ठूलो संख्यामा शव तथा मानव अवशेष फेला परेका छन्।
प्राप्त विवरणअनुसार रसुवामा १६९, नुवाकोटमा १९७, धादिङमा ७०, गोरखामा ७५, तनहुँमा ३८, चितवनमा ३६३, नवलपरासी पूर्वमा २२२ र नवलपरासी पश्चिममा २२१ जनाको शव तथा मानव अवशेष फेला परेको छ। यीमध्ये केही शव तथा मानव अवशेषको पहिचान हुन बाँकी रहेको जनाइएको छ। हालसम्म ९८ वटा शव परिवारलाई बुझाइएको छ।
बाढी तथा विपद्मा घाइते भएका ६ हजार ६ सय ७२ जनाले उपचार सेवा पाएका छन्। विभिन्न अस्पतालमा ३२३ जनाको उपचार गरिएकोमा २२८ जना डिस्चार्ज भइसकेका छन्। नेपाली सेनाले ३ हजार ३७९ तथा सशस्त्र प्रहरीले २ हजार ९७० जनालाई स्वास्थ्य उपचार उपलब्ध गराएको विवरणमा उल्लेख छ।
खोज तथा उद्धारका लागि नेपाल प्रहरी, नेपाली सेना र सशस्त्र प्रहरी गरी २१ हजार ४०२ सुरक्षाकर्मी परिचालन भएका छन्। नेपाल प्रहरीका ७ हजार ९१२, नेपाली सेनाका ९ हजार २८७ र सशस्त्र प्रहरीका ४ हजार २०३ जनशक्ति प्रभावित क्षेत्रमा परिचालित छन्।
सरकारले प्रभावित जिल्लाका लागि आर्थिक सहयोगसमेत उपलब्ध गराएको छ। रसुवा र नुवाकोटलाई १–१ करोड रुपैयाँ, धादिङलाई ५० लाख रुपैयाँ तथा प्रभावित १५ स्थानीय तहलाई गरी १३ करोड ५० लाख रुपैयाँ नगद सहयोग उपलब्ध गराइएको छ।
हाल ३९ वटा होल्डिङ सेन्टरमा ३ हजार ५३३ जना रहेका छन्। तीमध्ये रसुवामा ६६९, नुवाकोटमा २ हजार ६५१ र धादिङमा २१३ जना रहेको विवरण छ।
बाढीपछि करिब ४ हजार ९९६ जना अझै बेपत्ता रहेको जनाइएको छ। रसुवाको जिल्ला प्रशासन कार्यालयबाट करिब १ हजार ९६७, नुवाकोटबाट करिब २ हजार ३४०, सुरक्षाकर्मी तथा सरकारी कर्मचारीबाट करिब १०० र विदेशी नागरिकतर्फ ५८९ जना बेपत्ता रहेको विवरण सार्वजनिक गरिएको छ।
हालसम्म १३ हजार ३९६ जनाको उद्धार गरिएको छ। उद्धार तथा राहतका लागि नेपाली सेनाका हेलिकप्टरले १ हजार १५७ उडान गरिसकेका छन्, जसमध्ये ७ सेप्टेम्बरमा मात्रै ३९ उडान भएका छन्। सशस्त्र प्रहरीले १९३ र काठमाडौंस्थित निजी क्षेत्रका हेलिकप्टरले १२९ उडान गरेको विवरणमा उल्लेख छ।
विद्युत् आपूर्तितर्फ रसुवामा ७८ प्रतिशत घरधुरीमा विद्युत् सेवा पुनःस्थापित भएको छ। नुवाकोटमा ९६.७ प्रतिशत र धादिङमा ९९.८ प्रतिशत घरधुरीमा विद्युत् सेवा फर्किएको छ।
सेप्टेम्बर ६ मा एक हेलिकप्टरमार्फत रसुवामा खाद्यान्न तथा राहत सामग्री पुर्याइएको थियो। त्यस्तै, चार वटा ट्रकमार्फत जेनेरेटर, सरसफाइ सामग्री र विद्यार्थीका लागि आवश्यक किटहरू प्रभावित क्षेत्रमा पठाइएको जनाइएको छ।
विपद्बाट प्रभावित नागरिकको मानसिक स्वास्थ्यलाई ध्यानमा राख्दै स्वास्थ्य मन्त्रालयले प्रभावित क्षेत्रमा १५० जना स्वास्थ्यकर्मी परिचालन गरेको छ। मनोसामाजिक परामर्श तथा स्वास्थ्य सेवासमेत सञ्चालन भइरहेको छ।
इन्धनतर्फ प्रभावित क्षेत्रमा ५८ हजार लिटर डिजेल, २५ हजार लिटर पेट्रोल, १३ हजार लिटर हवाई इन्धन र ४५७ वटा एलपी ग्यास सिलिन्डर मौज्दात रहेको विवरण सार्वजनिक गरिएको छ।
सञ्चार सेवातर्फ नेपाल टेलिकम (NTC) का १२० वटा टावरमध्ये ११७ वटा पुनः सञ्चालनमा आएका छन्। एनसेलका ७८ टावरमध्ये ७६ वटा सञ्चालनमा फर्किएका छन्।
खोज तथा उद्धार अभियान जारी रहेकाले बेपत्ता नागरिकको खोजी, राहत वितरण, स्वास्थ्य सेवा तथा आधारभूत पूर्वाधार पुनःस्थापनालाई प्राथमिकतामा राखिएको छ।
Add Comment