काठमाडौं। बडादसैँअन्तर्गत नवरात्रको चौथो दिन आज देशभर माता कुष्माण्डा देवीको पूजा–आराधना गरिँदैछ। आश्विन शुक्ल चतुर्थीका दिन नवदुर्गामध्ये चौथो स्वरूपका रूपमा पूजिने कुष्माण्डा देवीको आराधना गर्ने धार्मिक परम्परा छ।
धार्मिक मान्यताअनुसार माता कुष्माण्डालाई सृष्टिको उत्पत्तिसँग जोडिएको देवीका रूपमा लिइन्छ। भक्तजनले उहाँको पूजा गर्नाले जीवनमा सुख, शान्ति, समृद्धि र सकारात्मक ऊर्जा प्राप्त हुने विश्वास गर्छन्।
नवरात्रका अवसरमा घटस्थापना गरिएका घरका पूजाकोठा तथा विभिन्न देवी मन्दिरमा विशेष पूजा, आरती र पाठ गरिँदैछ। भक्तजनले दुर्गा सप्तशती अर्थात् चण्डीपाठ तथा देवीसम्बन्धी धार्मिक ग्रन्थहरूको पाठ गर्दै देवीको आराधना गर्ने परम्परा पनि छ।
नवरात्रका नौ दिनमा माता दुर्गाका नौ स्वरूपको क्रमशः पूजा गरिन्छ। पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा र चौथो दिन कुष्माण्डा देवीको पूजा गर्ने धार्मिक मान्यता छ।
बडादसैँलाई असत्यमाथि सत्य र अधर्ममाथि धर्मको विजयको प्रतीकका रूपमा पनि लिइन्छ। नवरात्रका दिनहरूमा भक्तजनले देवी दुर्गाको उपासना गर्दै परिवारको सुख, शान्ति र समृद्धिको कामना गर्ने गर्छन्।
