‘पञ्चायत’को पाँचौँ सिजन डिसेम्बर ३ देखि प्रसारण हुने

‘पञ्चायत’को पाँचौँ सिजन डिसेम्बर ३ देखि प्रसारण हुने

काठमाडौं । लोकप्रिय भारतीय वेब सिरिज ‘पञ्चायत’को पाँचौँ सिजन आगामी डिसेम्बर ३ देखि दर्शकमाझ आउने भएको छ। अमेजन प्राइम भिडियोले बुधबार नयाँ सिजनको प्रसारण मिति सार्वजनिक गरेको हो।

नयाँ सिजनमा उत्तर प्रदेशको काल्पनिक गाउँ फुलेरा र त्यहाँका सचिवजीको कथालाई निरन्तरता दिइनेछ। गाउँको राजनीति, पात्रहरूबीच बदलिँदो सम्बन्ध र हास्यपूर्ण घटनाक्रम यसपटक पनि सिरिजका प्रमुख आकर्षण रहनेछन्।

पाँचौँ सिजनमा नयाँ प्रधान मंजूदेवी र सचिवबीचको सम्बन्धसँगै प्रधानपति भूषणको भूमिकालाई पनि कथामा विशेष स्थान दिइएको छ।

सिरिजमा जितेन्द्र कुमार, रघुबीर यादव, नीना गुप्ता, सुनीता राजवर, फैजल मलिक, चन्दन राय, दुर्गेश कुमार र अशोक पाठकलगायत कलाकारको अभिनय रहेको छ। यसको निर्देशन दीपक कुमार मिश्राले गरेका हुन्।

सन् २०२० मा पहिलो सिजन सार्वजनिक भएको ‘पञ्चायत’को दोस्रो सिजन २०२२, तेस्रो सिजन २०२४ र चौथो सिजन २०२५ जुनमा रिलिज भएको थियो। पाँचौँ सिजन सार्वजनिक भएसँगै पाँच सिजन पूरा गर्ने भारतीय वेब सिरिजको सूचीमा ‘पञ्चायत’ पनि थपिनेछ। यसअघि ‘गुल्लक’ले पाँच सिजन पूरा गरिसकेको छ।

यो समाचारलाई प्रतिक्रिया दिनुहोस्

Leave a Reply