योर्कशायर । योर्कशायरमा बेलायतका राजा चार्ल्स तेस्रो मा अण्डा प्रहार भएको छ । यस कार्यमा संलग्न २३ वर्षीय युवकलाई प्रहरीले पक्राउ गरेको छ । राजा र रानी कन्सोर्ट क्यामिला एक कार्यक्रममा भाग लिन दुई दिने भ्रमणमा उत्तर इङ्गल्याण्डको योर्कशायर आइपुगेका थिए । त्याहाँ आन्दोलन गरिरहेका एक युवाले उनीहरुमाथि अण्डाले प्रहार गरेका थिए ।
एक प्रहरी अधिकारी अनुसार– राजा र रानी Micklegate Bar (योर्कशायरको परम्परागत शाही प्रवेशद्वार) मा मानिसहरूसँग कुरा गर्दै थिए । राजालाई स्वागत गर्न मानिसहरू ’भगवानले राजा बचाऊ’ भन्दै नारा लगाइरहेका बेला एक व्यक्तिले उनीहरूमाथि अण्डा प्रहार गरेका थिए । अण्डा प्रहार गर्ने व्यक्ति यो देश दासको रगतले बनेको हो कराउँदै थिए । हामीले उनलाई पक्राउ गरेका छौं ।
पक्राउपछि ती व्यक्तिले भने– म दासता, उपनिवेशवाद र साम्राज्यवाद पीडितको साथमा छु । यी अण्डाहरू न्यायको उपायको रूपमा फ्याँकिएको हो । त्यो मानिस (राजा चार्ल्स) लाई राजा बनाउन ज्यान गुमाएकाहरूलाई न्याय हो । यो जनताले देख्न सक्ने न्याय हो । अण्डा फ्याँक्नेको छेउमा केही मानिस ब्यानर बोकेर उभिएका थिए । ब्यानरमा लेखिएको थियो– मेरो राजा होइन, मेरो राजा होइन ।
डेली मेलको रिपोर्ट अनुसार अण्डा प्रहर गर्ने व्यक्तिको नाम प्याट्रिक थेलवेल हो । सामाजिक सञ्जालमा रहेको उनको प्रोफाइल अनुसार उनी वामपन्थी कार्यकर्ता हुन् र स्थानीय चुनावमा ग्रीन पार्टीको उम्मेदवार बनेका थिए । प्याट्रिक युनिभर्सिटी अफ योर्क गार्डनिङ सोसाइटीका अध्यक्ष पनि भइसकेका छन् । उनले ब्लगमा जलवायु परिवर्तनका बारेमा लेखिरहन्छन् ।
शाही परिवारका सदस्यमाथि अण्डा प्रहार भएको यो पहिलो पटक भने होइन । सन् १९८६ मा महारानी एलिजाबेथमाथि पनि अण्डा प्रहार गरिएको थियो । उनी श्रीमान् प्रिन्स फिलिपसँग न्यूजिल्याण्ड भ्रमणमा गएकी थिइन् । त्यही क्रममा दुवै जना खुला गाडीमा मानिसहरुका बीचबाट गुज्रिरहेका थिए । त्यसपछि दुई महिलाले उनीमाथि अण्डा प्रहार गरेका थिए । प्रहरीले दुवै महिलालाई पक्राउ गरेको थियो ।
२००१ मा प्रिन्स चार्ल्स लाटभिया को भ्रमण मा थिए । त्यही क्रममा १६ वर्षीया किशोरीले उनलाई थप्पड हानेकी थिइन् । यद्यपि केटीको हातमा फूल थियो । यति मात्र होइन, युवतीले बेलायतलाई विश्वको शत्रु समेत भनेकी थिइन् । युवतीले अफगानिस्तान युद्धको विरोधमा राजकुमार चार्ल्सलाई थप्पड हानेको प्रहरीलाई बताएकी थिइन् ।
Add Comment