विशेष सुविधासहित जेलमा इमरान खानको मासिक १२ लाख खर्च

इस्लामाबाद । पाकिस्तानका पूर्वप्रधानमन्त्री इमरान खानको सुरक्षालाई लिएर जेल अधिकारीले ठूलो खुलासा गरेका छन् । रावलपिंडीको अदियाला जेलमा रहेका इमरान खानको सुरक्षामा करिब १२ लाख रुपैयाँ अर्थात् १२ लाखभन्दा बढीको मासिक बिल खर्च भइरहेको छ । जेल सुपरिटेन्डेन्टले लाहोर हाई कोर्ट (एलएचसी) मा रिपोर्ट पेस गरेका छन् । यस रिपोर्टका अनुसार ७१ वर्षीय इमरान खानलाई जेल परिसरभित्र धेरै विशेष सुविधा उपलब्ध गराइएको छ । यसमा ५० हजार रुपैयाँको छुट्टै सिसिटिभी क्यामेरा जडान गरिएको छ, जसले ७ हजार अन्य कैदीलाई निगरानी गर्छ ।

एक्सप्रेस ट्रिब्यून अखबारका अनुसार इमरान खानको खाना असिस्टेन्ट सुपरिटेन्डेन्टको निगरानीमा छुट्टै सफा किचनमा बनाइन्छ । खानलाई खाना खुवाउनुअघि मेडिकल अफिसर वा डेपुटी सुपरिटेन्डेन्टले निरीक्षण गर्छ । पूर्वप्रधानमन्त्रीको उपचारका लागि होली फैमिली अस्पतालका ६ जनाभन्दा बढी चिकित्सकको टोली तैनाथ गरिएको छ भने थप विशेषज्ञ टोलीले नियमित चेकअप गर्ने गरेको छ ।

इमरान खानलाई जम्मा ७ वटा सेल आवंटित गरिएको छ, जसमध्ये २ मा उनी बस्छन् । बाँकी ५ वटा सुरक्षाका कारण बन्द राखिएको छ । सामान्यतया, यी कक्षहरूमा ३५ कैदीहरू राखिन्छन्। खानको कोठरीमा यसरी कसैले पस्न पाउँदैन । त्यहाँ धेरै कडा प्रतिबन्धहरू छन् । खानलाई भेट्ने हो भने अनुमति लिनु जरुरी छ । यस कक्षको सुरक्षाका लागि तालिमप्राप्त कर्मचारी खटाइएको छ ।

अडियाला जेलमा सामान्यतया प्रत्येक १० कैदीबन्दीमा एक जना कामदार राख्छन् । तर, खानको सुरक्षामा दुई सुरक्षा अधिकारी र तीनजना व्यक्तिगत सुरक्षाकर्मीसहित १५ कर्मचारी छन् । यसका साथै कारागार परिसरभित्र व्यायाम मेसिनदेखि मनोरञ्जनका अन्य धेरै व्यवस्था समेत राखिएको छ । आगन्तुकहरूका लागि कडा नियमहरू लगाइएको छ । एकै समयमा, व्यापक सुरक्षा प्रोटोकलहरू अदालतको कार्यवाहीको समयमा लागू गरिन्छ । इमरान खान र सबै कैदीहरूको लागि सुरक्षित वातावरण कायम गर्न अडियाला जेल र वरपर अतिरिक्त पुलिस बल, रेंजर्स र विशेष कर्मचारीहरू तैनाथ गरिएको छ ।