काठमाडौँ, असार २१ । काठमाडौँ महानगरपालिकाको कल सेन्टरमा एक बर्षमा २८ हजार १७२ कल टेलिफोन आएका छन् । यसमध्ये २६ हजार १४ कल (९२%) फोन सोधपुछ र जानकारीका लागि आएका हुन् । बाँकी २ हजार १५८ कल (८%) फोन गुनासा र समस्याका लागि टिपाएका थिए । यसरी टिपाइएका समस्यामध्ये १ हजार ७६५ गुनासा÷समस्या समाधान भइसकेका छन् । ३९१ (१८%) समाधान हुन बाँकी छन् । आज कल सेन्टरले आयोजना गरेको वार्षिक समीक्षा कार्यक्रममा कल सेन्टर एकाइ प्रमुख (नोडल अफिसर) भरतप्रसाद पोखरेलले यो तथ्याङ्क प्रस्तुत गरेको हो ।
पोखरेलकाअनुसार फोनमा गुनासा समस्यासँगै सहयोगको माग प्राप्त भएका थिए । यसमध्ये सबैभन्दा धेरै महानगर प्रहरी बलको दायित्व तथा कामसँग जोडिएका (९६३ वटा) थिए । यसमध्ये ९२१ वटा समाधान भइसकेका छन् । ४२ वटा सम्बोधन हुन बाँकी छन् । यस्तै कृषि तथा पशुपन्छी विभागसँग सम्बन्धित ४०३ कलमध्ये ३८९ वटा समाधान भइसकेका छन् । १४ वटा समाधान गर्न बाँकी छन् । सार्वजनिक निर्माण विभागसँग सम्बन्धित २२० वटा कल थिए । यसमध्ये १४८ वटा समाधान भइसकेका छन् । ७२ वटा सम्बोधन हुन बाँकी छ । वातावरण व्यवस्थापन विभागसँग सम्बन्धित २१२ वटा कल थिए । जसमध्ये १८९ वटा समाधान भइसकेका छन् । २३ वटा समाधान हुन बाँकी छन् ।
स्वास्थ्य विभागसँग सम्बन्धित ३० वटा कलमध्ये १४ वटाको सम्बोधन भएको छ । १६ वटा सम्बोधन हुन बाँकी छ । शिक्षा विभागसँग सम्बन्धित ११६ वटा कलमध्ये ७ वटाको मात्र समाधान आएको छ । १०९ वटाको समाधान दिन बाँकी छ । विभागहरुमध्ये सबैभन्दा धेरै समाधान दिनु पर्ने विभाग शिक्षा भएको छ । प्रशासन विभागसँग सम्बन्धित ३६ वटा कलमध्ये ७ वटाको समाधान दिइएको छ । २९ वटाको समाधान दिन बाँकी छ । सहकारी विभागसँग सम्बन्धित १६ वटा कल आएका थिए । यी सबै कलको समाधान दिन बाँकी भएको नोडल अफिसर पोखरेलले जानकारी दिए ।
राजस्व विभागसँग सम्बन्धित ४२ वटा कलमध्ये ४२ वटाकै समाधान दिइएको छ । शतप्रतिशत कार्य सम्पन्न गर्ने यही विभाग भएको छ । सामाजिक विकास विभागसँग सम्बन्धित ८ वटा कलमध्ये एउटाको समाधान दिइएको छ । ७ वटाको दिन बाँकी छ । अन्य विभिन्न विभागसँग सम्बन्धित ४७ वटा कलमध्ये ११ वटाको सम्बोधन गरिएको छ । ३५ वटाको सम्बोधन गर्न बाँकी छ । यस्तै हेलो सरकारबाट ५७४ गुनासा तथा समस्या आएका थिए । यीमध्ये २३० वटाको समाधान दिइसकिएको छ भने ३४४ को समाधान दिन बाँकी छ ।
यसमा महानगर प्रहरी बलसँग सम्बन्धित १८९ वटा विषय थिए । जसमध्ये १५० वटाको समाधान दिइसकिएको छ । ३९ वटाको दिन बाँकी छ । सार्वजनिक निर्माण विभागसँग सम्बन्धित ११३ वटा विषयमा ८ वटाको समाधान दिइएको छ । १०८ वटाको समाधान दिन बाँकी छ । वातावरण व्यवस्थापन विभागसँग सम्बन्धित ५४ वटा विषयमध्ये २६ वटामा समाधान दिइएको छ । २८ वटामा समाधान दिन बाँकी छ । प्रशासन विभागसँग सम्बन्धित ४७ वटा विषयमध्ये ४ वटाको समाधान दिइएको छ । ४१ वटा बाँकी छन् ।
शिक्षा विभागसँग सम्बन्धित ३८ वटा विषयमध्ये सबैमा समाधान दिनुपर्ने छ । कृषि तथा पशुपन्छी विभागअन्तर्गतका ३० वटा विषयमध्ये २२ वटामा समाधान दिइसकिएको छ । ८ वटामा समाधान दिन बाँकी छ । राजस्व विभागसँग सम्बन्धित ११ वटा विषयमध्ये ५ वटामा समाधान दिइएको छ । ६ वटाको बाँकी छ । सहकारी विभागसँग सम्बन्धित १० वटामध्ये ७ वटाको समाधान दिइएको छ । ३ वटाको बाँकी छ । अन्य ६२ वटा विषयमध्ये ८ वटाको समाधान भएको छ । ५४ वटाको बाँकी छ ।
कल सेन्टरमा सर्वसाधारणले ११८० र १६६००१०५५११ नं. मा टेलिफोन गर्ने गरेको छ । यसरी प्राप्त विषयलाई क्षेत्रअनुसार वर्गीकरण गरेर कल सेन्टरले सम्बन्धित विभागमा समाधानका लागि पठाउने गरेको छ । यसरी समस्या पठाइपछि प्रणालीबाट ट्र्याकिङ् गर्ने गरिएको छ । आफूले टिपाएको विषय सम्बोधन भयो कि भएन भनेर सेवाग्राहीले www.gunaso.kathmandu.gov.np मा गएर हेर्न सक्ने व्यवस्था मिलाइएको छ । यो प्रणालीमा कर्मचारीबाट फोनको जवाफ दिने, यसरी दिएको प्रश्न उत्तर रेकर्ड गर्ने, डकुमेन्ट गर्ने, गुनासोको वर्गीकरण गर्ने समाधानका लागि सम्बन्धित विभाग, महाशाखा, शाखा, एकाइ, सचिवालय वा सम्बन्धित ठाउँमा पठाउने, गुनासो दर्ता भएको सेवाका परामर्शदाता नवराज गुरुङ्का अनुसार गुनासो दर्ता भइसकेपछि सेवाग्राहीको मोवाइलमा दर्ता नं. जान्छ । वेभसाइटमा गएर यो दर्ता नम्बर राखिसकेपछि आफ्नो गुनासोको अवस्था हेर्न मिल्छ । समाधान भइसकेको भए क्लोज्ड देखिन्छ ।
समीक्षा कार्यक्रममा बोल्दै सूचना प्रविधि विभागका प्रमुख अनिरुद्र नेपालले, महानगरपालिकाले सेवा तथा सुविधा व्यवस्थापनलाई प्रणालीमा आवद्ध गरेर सकेसम्म सुरु विन्दुमै गुनासालाई घटाउने प्रयास गरिरहेको उल्लेख गरे । ‘यो सबैको समान बुझाइ र इमान्दार प्रयासबाट सम्भव हुन्छ ।’ उनले भने, ‘आन्तरिक सूचना प्रणालीले पनि धेरै गुनासाहरुलाई सुरु विन्दुमा समाधान गर्न सकिन्छ ।’ समीक्षा कार्यक्रममा विभाग र वडाका फोकल पर्सनहरुलाई सहभागी गराइएको थियो ।
Add Comment