खैबर पख्तुनख्वा (पाकिस्तान) मंसिर ९ । पाकिस्तानको उत्तरपश्चिमी खैबर पख्तुनख्वा प्रान्तको कुर्रम जिल्लामा भएको ताजा साम्प्रदायिक हिंसामा कम्तीमा ३७ जनाको मृत्यु भएको छ भने १०३ जना घाइते भएका छन् । मृतकको संख्या लगातार बढिरहेको छ । पाकिस्तानमा शिया र सुन्नीबीच बढ्दो द्वन्द्वले दिनहुँ मानिसको ज्यान लिइरहेको छ । हिंसाको यो पछिल्लो घटना शिया समूहको आक्रमणको प्रतिक्रिया हो । जसमा बिहीबार पाराचिनारबाट जाँदै गरेको यात्रुवाहक भ्यानमा अज्ञात बन्दुकधारीले आक्रमण गरी ४७ सिया मुस्लिमको हत्या गरेका थिए ।
जानकारी अनुसार, शनिबार बिहान कुर्रम जिल्लामा ताजा साम्प्रदायिक झडप सुरु भयएको थियो, जसमा भारी हतियारका साथ ठूलो संख्यामा बन्दुकधारीहरूले नजिकैका गाउँहरूलाई निशाना बनाएका थिए । गाउँहरू भग्नावशेषमा परिणत भएका छन् भने घर, बजार र सरकारी भवनमा आगो लगाइएको थियो ।
कुर्रम जिल्लाका एक अधिकारीका अनुसार “आक्रमण शिया आतंकवादी समूह जैनाबियुनले गराएको थियो, जसले बिहीबार शियाहरूको हत्याको बदला लिने वाचा गरेको थिए । त्यसपछि उनका मानिसहरूले गाउँमा आक्रमण गरे र सबै जलाएका थिए । मृत्यु हुनेको संख्या बढ्न सक्ने अनुमान गरिएको छ ।” नरसंहारका एक प्रत्यक्षदर्शीले पुष्टि गरे अनुसार उनले कम्तीमा छ आक्रमणकारीहरूको जलेको शव पनि देखेका थिए ।
रिपोर्टहरूका अनुसार आक्रमणकारीहरूले महिलाहरूलाई पनि अपहरण गरेका छन् र जिल्लाका शिया र सुन्नी सम्प्रदायका जनजाति अग्रजहरूले आक्रमणलाई तीव्र पार्न सन्देशहरू पठाएका छन् । कुर्रम जिल्लाका कम्तीमा पनि तीन स्थानबाट झडप भइरहेका छन् भने कोहट जिल्लाबाट थाल–सदा–पराचिनार राजमार्ग बन्द छ ।
जारी झडप तीव्र बन्दै गएपछि खैबर पख्तुनख्वा (केपी) को प्रान्तीय सरकारको एक प्रतिनिधिमण्डल कानून र व्यवस्थाको अवस्थाको समीक्षा गर्न पेशावरबाट कुर्रम जिल्लाको लागि प्रस्थान गरेको छ । हेलिकप्टरमा खैबर पख्तुनख्वाका कानुनमन्त्री, मुख्य सचिव र प्रहरी महानिरीक्षक सम्मिलित सरकारी प्रतिनिधिमण्डल सवार थियो ।
प्रतिनिधिमण्डलले कुर्रम जिल्लामा स्थानीय प्रशासनलाई भेटे, तर फर्कने क्रममा हेलिकप्टरमाथि गोली प्रहार भएको बताइएको छ । तर, हेलिकप्टर सकुशल पेसावर अवतरण गर्न सफल भएको थियो । कुर्रम जिल्लाको अवस्था झन् गम्भीर बन्दै गएको छ । पछिल्लो ४८ घण्टामा सुन्नी र शिया साम्प्रदायिक भिडन्तमा करिब १०० जनाको मृत्यु भएको छ भने २ सय जना घाइते भएका छन् । कुर्रम जिल्लामा साम्प्रदायिक हिंसाको इतिहास छ । प्रान्तीय गभर्नर फैसल करिम कुण्डीका अनुसार सेप्टेम्बरमा भएका छुट्टाछुट्टै घटनामा दुवै सम्प्रदायका कम्तीमा ६० जनाको मृत्यु भएको थियो ।
शिया बहुल पाराचिनार क्षेत्रमा शुक्रबार भएको प्रदर्शनका क्रममा प्रहरीको गाडी र सुरक्षा चौकीमा आगजनी गरिएको थियो । साथै ढुङ्गा र टायर बालेर सडक अवरुद्ध गरिएको थियो । पाराचिनार यसअघि पनि सुन्नी बाहुल्य क्षेत्रमा हिंसात्मक झडपको सिकार भएको थियो । पाराचिनारका प्रदर्शनकारीहरूले खराब अवस्था, खाद्यान्न, औषधि, इन्धन र अक्सिजनको अभावमा अफगानिस्तानसँगको सीमा तत्काल खोल्न माग गरेका छन् ।
शिया संगठन र राजनीतिक दल मजिस वाहदत मुस्लिमीन (एमडब्ल्यूएम) ले असुरक्षित सडकका कारण पाराचिनार विमानस्थल सञ्चालन गर्न र पीआईए वा वायुसेनाको विमानबाट पाराचिनारदेखि पेशावरसम्म निःशुल्क शटल सेवा सुरु गर्नुपर्नेलगायतका केही मागहरू सरकारसमक्ष राखेका छन् ।
आन्दोलनकारीले आफ्ना मागलाई प्रदेश र केन्द्र सरकारले बेवास्ता गरे मानवअधिकार संगठन र संयुक्त राष्ट्र संघको सहयोग लिन बाध्य हुने चेतावनी दिएका छन् । (आईएएनएस)
Add Comment