पाकिस्तानमा सेनालाई शूट एट साइटको आदेश खानका समर्थकहरूद्वारा हिंसात्मक प्रदर्शन, हिंसामा चार रेन्जरको मृत्यृ

ईस्लामाबाद, (पाकिस्तान) मंसिर ११ । पाकिस्तानको अवस्था अहिले निकै नाजुक बन्दै गएको छ । इमरान खानका कार्यकर्ताहरूको इस्लामाबाद मार्च हिंसात्मक बनेको छ । इमरान खानको रिहाइको माग गर्दै जारी हिंसात्मक प्रदर्शनमा चार रेन्जरको मृत्यु भएको छ । यस घटनापछि पाकिस्तानी सेनालाई इस्लामावादले शूट एट साइटको आदेश जारी गरेको छ । इमरान खानका हजारौं समर्थक उनको रिहाइको माग गर्दै इस्लामाबादको सडकमा उत्रिएका छन् ।

पाकिस्तान तहरीक–ए–इन्साफका कार्यकर्ताहरूले जेलमा रहेका पूर्वप्रधानमन्त्री इमरान खानको रिहाइको माग गर्दै इस्लामाबादतर्फ मार्च गरिरहेका छन् । सोमबार उनीहरु इस्लामावादको सीमामा प्रवेश गरेका थिए र उनीहरुको लक्ष्य डी–चोक पुग्ने थियो । यसका लागि इस्लामाबादमा कडा सुरक्षा व्यवस्था गरिएको छ । संविधानको धारा २४५ बमोजिम शान्ति सुरक्षा कायम गर्न सेना परिचालन गरिएको छ । इस्लामावादमा नोभेम्बर १८ देखि धारा १४४ पनि लागू गरिएको छ । इमरान खानका समर्थकहरूले इस्लामाबादमा सरकारले लगाएको लकडाउनको उल्लंघन गरिरहेका छन् ।

वास्तवमा इमरानले आन्दोलनको अन्तिम आह्वान गरेका थिए । यसमा उनले आफ्ना समर्थकहरूलाई इस्लामाबादमा मार्च गर्न आग्रह गरेका थिए ताकि उनीहरूले इमरान सहित सबै पीटीआई बन्दीहरूको रिहाइको माग गर्न सकून् । यसका साथै उनले फागुन ८ फेब्रअरी गते भएको निर्वाचनमा आफ्नो कथित विजयलाई मान्यता दिन र २६औं संविधान संशोधन खारेज गर्न पनि आफ्ना समर्थकहरुलाई आग्रह गरेका छन् । २६औँ संविधान संशोधनले न्यायाधीश र प्रधानन्यायाधीश नियुक्तिको प्रक्रिया परिवर्तन गरेको छ । यो वर्षको जनवरीमा तोशाखाना मुद्दामा इमरानलाई १४ वर्षको जेल सजाय र २० लाख जरिवानाको सजाय सुनाइएको थियो ।