चीनको हेबेई प्रान्तमा आएको बाढीका कारण २९ जनाको मृत्यु, १६ बेपत्ता, १७ लाख मानिस पलायन हुन बाध्य

बेईझिङ्ग । चीनको हेबेई प्रान्तमा बाढीले ठूलो क्षति पु¥याएको छ । भारी बाढीका कारण हेबेई प्रान्तमा हालसम्म २९ जनाको मृत्यु भएको छ भने १६ जना बेपत्ता छन् । चीनको आधिकारिक मुखपत्र ग्लोबल टाइम्सले यो जानकारी दिएको छ । मिडिया रिपोर्टका अनुसार चीनको हेबेई प्रान्तमा प्राकृतिक प्रकोपका कारण करिब ९५.८११ अर्ब युआनको क्षति भएको अनुमान गरिएको छ ।

बाढीका कारण हेबेईबाट १७ लाख मानिसलाई सुरक्षित स्थानमा सारिएको सञ्चारमाध्यमहरुले जनाएका छन् । चीनले बाढीको क्षतिपछि पुनर्निर्माण गर्न करिब दुई वर्ष लाग्न सक्छ । चीनको अर्थ मन्त्रालय र आपतकालीन व्यवस्थापन मन्त्रालयले बाढी पीडितका लागि १ अर्ब ४६ करोड युआन राहत दिने घोषणा गरेको छ । यो रकम बेइजिङ, तियानजिन, हेबेई, जिलिन र हेइलोङजियाङका बाढी प्रभावित जनतालाई वितरण गरिने छ ।

चीनको केन्द्र सरकारले बाढी नियन्त्रण र विपद् व्यवस्थापनका लागि जम्मा ७ अर्ब ७ करोड युआन निकासा गरेको छ ।
चीनको हेबेई प्रान्त भारी वर्षा र आँधीबाट नराम्ररी प्रभावित भएको छ । भारी वर्षा र आँधीले हेबेईमा बाढी निम्त्याएको छ । हेबेई प्रान्तका कार्यवाहक उप–गभर्नर झाङ चेङजोङले बाढीमा परी मृत्यु भएकाहरू र उनीहरूका परिवारप्रति समवेदना व्यक्त गरेका छन् । पत्रकार सम्मेलनमा उनले मृतकहरुको सम्झनामा मौन धारण समेत गरेका थिए ।